కేసీఆర్ పై అనుచిత పోస్టులు.. ఫేస్ బుక్ తిప్పలు

Posted: 01/10/2018 04:51 PM IST

తెలంగాణ ప్రభుత్వానికి ప్రముఖ సామాజిక మాధ్యమం ‘ఫేస్ బుక్’ సంస్థకు మధ్య కోల్డ్ వార్ మొదలైంది. సీఎం కేసీఆర్ పై అనుచిత వ్యాఖ్యలు చేస్తూ ‘ఫేస్ బుక్’ లో గతంలో కొందరు ఆగంతకులు పోస్ట్ లు చేశారు.. అయితే అవి ఏ ఐపీ అడ్రసుల నుంచి వచ్చాయోతెలుసుకునేందుకు హైదరాబాద్ సీసీఎస్ పోలీసులు విశ్వప్రయత్నం చేసినప్పటికీ ఫలితం దక్కలేదు.

దీంతో సాయపడాల్సిందిగా కోరుతూ ‘ఫేస్ బుక్’ నిర్వాహకులను సీసీఎస్ పోలీసులు కలిశారు. అయితే, ఆ ఐపీ అడ్రసు వివరాలు చెప్పమని ‘ఫేస్ బుక్’ తేల్చి చెప్పింది. సాధారణ కేసులు లాంటిది కాదని, సీఎంపై అనుచిత వ్యాఖ్యలు చేసిన కేసు అని పోలీసులు ఎంతగా చెప్పినప్పటికీ వారు పట్టించుకోలేదు. ఈ సంఘటనపై మండిపడుతున్న పోలీసులు ఈ విషయమై కేంద్ర హోం మంత్రిత్వ శాఖకు ఫిర్యాదు చేశారు. ఈ మేరకు సీఐడీ ద్వారా ఎంహెచ్ ఏకు ఓ లేఖ రాశారు.

కాగా, కేసీఆర్ పై అనుచిత వ్యాఖ్యలు చేసిన వ్యవహారంపై చాదర్ ఘాట్ పోలీసులు గతంలో కేసు నమోదు చేశారు. అయితే, తర్వాత ఈ కేసు సైబర్ క్రైమ్ పోలీసులకు బదిలీ అయింది. అప్పటి నుంచి కూడా ఈ కేసుపై విచారణ జరగుతోంది. ‘ఫేస్ బుక్’ నిర్వాహకులు సంబంధిత వ్యక్తుల ఐపీ అడ్రసులు ఇవ్వకపోవడంతో ఆ పోస్ట్ లు ఎవరు చేశారా అనే విషయం ఇప్పటివరకూ ఎటూ తేల్చలేకపోతున్నారు. మరోవైపు ఈ కేసు దర్యాప్తు జాప్యం అవుతుండటంతో సీఎం కార్యాలయం సీసీపీఎస్ విభాగంపై ఆగ్రహం వ్యక్తం చేసినట్లు తెలుస్తోంది.