ITEMVIDEOS: భావన కేసులో ప్రధాన నిందితుడి అరెస్టు.. కోర్టులో హైడ్రామా..

Posted: 02/23/2017 04:21 PM IST

మళయాళ నటి భావన అపహారణ, అత్యాచారం కేసులో ప్రధాన నిందితుడైన సునీల్ కుమార్ అలియాస్ పల్సర్ సునిని కొచ్చిలోని జిల్లాకోర్టు ప్రాంగణంలో హై డ్రామా మధ్య పోలీసులు అదుపులోకి తీసుకున్నారు. దక్షిణ భారత చలనచిత్రాలలో నటించిన ప్రముఖ నటిని పాత కక్షల నేపథ్యంలో కిడ్నాప్ చేసి, మరికోందరు నిందితులతో కలసి అత్యంత దారుణానికి పాల్పడిన ఘటనలో ప్రధాన నేరస్థుడైన సునీల్.. సరిగ్గా నటిని అపహరణకు వేసిన మాదిరిగానే ఇక స్కెచ్ ప్రకారం పోలీసుల కళ్లు గప్పి ఏకంగా న్యాయస్థానంలోనే లొంగిపోయేందుకు వచ్చాడు.

అయితే అతని స్కెచ్ ఇక్కడ కూడా సఫలీకృతం అయ్యేదే కానీ పోలీసులు సరైన సమయంలో సరిగ్గా స్పందించడంతో బెడిసికొట్టింది. అతనితో పాటు వున్న మరో నిందితుడు విగేష్ కూడా పోలీసులు అదుపులోకి తీసుకున్నారు. సుమారుగా వారం రోజుల పాటు అక్కడా ఇక్కడ ఎక్కడెక్కడో తలదాచుకున్న సునీల్ పోలీసు కస్టడీకి వెళ్లకుండా ఏకంగా కోర్టులో లొంగిపోవాలని భావించాడు. అందుకు చక్కగా స్కెచ్ కూడా వేసుకున్నాడు. సరిగ్గా మధ్యాహ్నం సమయంలో మరో నిందితుడైన విగీష్‌తో కలిసి లొంగిపోయేందుకు సునీ ఏసీజేఎం కోర్టుకు వచ్చాడు.

ఆ సమయంలో మేజిస్ట్రేట్ భోజనానికి వెళ్లిడంతో అతని ప్రణాళిక బెడిసికోట్టింది. అయితే బోనెక్కిన తనను పోలీసులు అదుపులోకి తీసుకోరన్న ధైర్యంతో వుండగా, ఒక్కసారిగా పోలీసులు లోపలకు దూసుకొచ్చి.. బోనులో వున్న పల్సర్ సుని, విగీష్ ఇద్దరినీ అదుపులోకి తీసుకున్నారు. మేజిస్ట్రేట్ కుర్చీ ఖాళీగా ఉండటంతో పోలీసుల పని సులువైంది. అయితే పోలీసుల అదుపులోకి తీసుకుంటామంటే రానని మెండికేసిన సునిని పట్టుకుని లాగేశారు. అతడు వారిని ప్రతిఘటించేందుకు ప్రయత్నించినా ఫలితం లేకపోయింది.

దీంతో కోర్టులో ఉన్న న్యాయవాదులకు, పోలీసులకు మధ్య తీవ్ర ఘర్షణ చోటుచేసుకుంది. ఈ గొడవలో సునీ కింద పడిపోగా.. పోలీసులు అతడిని ఈడ్చుకుంటూ లాక్కెళ్లి కోర్టు బయట ఉన్న వ్యానులోకి తోశారు. పోలీసుల ప్రవర్తన పట్ల న్యాయవాదులు తీవ్ర ఆగ్రహం వ్యక్తం చేశారు. అతడు హంతకుడు కావచ్చు, రేపిస్టు కావచ్చు గానీ.. కోర్టుకు మాత్రం అతడిపై నేరం రుజువయ్యేవరకు కేవలం నిందితుడు మాత్రమేనని, కోర్టు నుంచి నిందితులను లాక్కెళ్లే హక్కు పోలీసులకు లేదని న్యాయవాదులు అన్నారు. ఇప్పుడు సుని, విగీష్‌లను అలువాలోని పోలీసు క్లబ్‌ వద్ద ప్రశ్నిస్తున్నారు.