అభివృద్దే అజెండా: మోదీ

Posted: 03/21/2016 07:58 AM IST

భారతదేశం అభివృద్ధి పైనే తాము దృష్టి కేంద్రీకరించినట్లు ప్రధాని నరేంద్రమోదీ స్పష్టం చేశారు. ప్రభుత్వం ఇందుకు చేస్తున్న కృషికి కొన్ని శక్తులు అడ్డంకిగా మారాయని మోదీ ఆరోపించారు. ప్రతిపక్షాల నెగెటివ్ ఎజెండా కుట్రలో తాము పడిపో బోమన్నారు. బీజేపీ జాతీయ కార్యవర్గం సమావేశంలో దేశం సర్వతోముఖంగా అభివృద్ధి చేయాలన్నదే తన లక్ష్యమని ప్రధాని పునరుద్ఘాటించారు. ప్రతిపక్షాలది నెగిటివ్ రాజకీయాలని ప్రధాని విమర్శించారు. పార్లమెంటు సభ్యులు, నాయకులు ఇష్టం వచ్చిన ట్లు ప్రతి విషయంమీద వ్యాఖ్యానించవద్దని ప్రధాని హెచ్చరించారు. పార్టీ వైఖరిని మీడియాకు , ప్రజలకు వివరించేందుకు ప్రత్యేక విభాగం ఉందన్నారు.

బీజేపీ కార్యకర్తలు ప్రతి గ్రామానికీ తిరిగి ప్రభుత్వం చేస్తున్న అభివృద్ధిని వివరించాలన్నారు. ఆ విధంగా గ్రామాల్లో బీజేపీ విస్తరణ జరుగుతుందన్నారు. 65 ఏళ్లుగా నిర్లక్ష్యానికి గురైన ప్రతి గ్రామాన్ని సందర్శించి, అక్కడి సమస్యలు తీర్చాలని పేర్కొన్నారు. బేటీ బచావో.. బేడీ పడావో పథకం గ్రామ గ్రామానికీ చేరాలన్నారు. 22 నెలల తమ పాలనపై ఎలాంటి ఆరోపణలు లేవని తెలిపారు. కాంగ్రెస్ తో పాటు కొన్ని పార్టీలు చేస్తున్న మోదీ వ్యతిరేక ప్రచారాన్ని పార్టీ కార్యకర్తలు అభివృద్ది మంత్రంలో అడ్డుకోవాలని మోదీ పరోక్షంగా సూచించారు.