పరాయి వ్యక్తితో భార్య పరార్.. భర్త ప్రతీకారం మరొకరిపై!

Posted: 09/07/2015 03:50 PM IST

భర్తతో కలకాలం సుఖంగా జీవించాల్సిన భార్యలు కలహాలకు కేంద్రబిందువుగా మారుతున్నట్లు కనిపిస్తున్నారు. తమ మోజు తీర్చుకోవడం కోసం పరాయి వ్యక్తులతో అక్రమ సంబంధం పెట్టుకోవడం.. కుదిరితే అందరిని వదిలేసి వారితో పారిపోవడం లాంటివి చేస్తున్నారు. ఇటువంటి ఘటనలు ఇప్పటికే ఎన్నో చోటు చేసుకోగా.. తాజాగా మరో ఇల్లాలు పరాయి వ్యక్తితో పరారవ్వడం తీవ్రకలకలం సృష్టించింది. దీంతో ఆమె భర్త మరొకరిపై తన ప్రతీకారం తీర్చుకున్నాడు.

వివరాల్లోకి వెళ్తే.. ఉత్తరప్రదేశ్ రాష్ట్రం రాయ్ బరేలీలోని మీర్ గంజ్ ప్రాంతానికి చెందిన వూరన్ లాల్ అనే వ్యక్తికి ఓ మహిళతో వివాహం అయ్యింది. కొన్నాళ్లపాటు వీరి దాంపత్యజీవితం సవ్యంగానే కొనసాగింది. అయితే.. ఇంతలోనే ఆ వివాహితకు డోరిలాల్ అనే వ్యక్తితో పరిచయం అయింది. అది వివాహేతర సంబంధానికి దారితీసింది. కొన్నాళ్లు వీరు తమ అక్రమబంధాన్ని ఎవరికీ తెలియకుండా గుట్టుగానే సాగించారు. వూరన్ లాల్ కి తన భార్య ప్రవర్తనలో మార్పులు గమనించినప్పటికీ.. ఆమె అక్రమబంధాన్ని కనిపెట్టలేకపోయాడు. ఈ క్రమంలోనే ఇద్దరూ పారిపోవాలని పథకం వేశారు. ప్లాన్ ప్రకారం.. వూరన్ లాల్ ఇంట్లో లేని సమయంలో అతని భార్య, డోరీలాల్ పారిపోయారు.

ఈ విషయం తెలుసుకున్న వూరన్ లాల్.. తీవ్ర ఆగ్రహానికి గురై డోరీలాల్ కుటుంబాన్ని బెదిరించాడు. తన భార్యను వెనక్కు తీసుకురాకపోతే విపరీత పరిణామాలను ఎదుర్కొనవలసి వస్తుందంటూ చాలాసందర్భాల్లో బెదిరించాడు కూడా! కాలక్రమంలో మరింత కోపాద్రిక్తుడైన వూరన్ లాల్.. తాజాగా డోరీలాల్ అన్నపై యాసిడ్ దాడికి పాల్పడ్డాడు. వెంటనే వారు పోలీసులకు సంప్రదించగా.. కేసు నమోదు చేసి దర్యాప్తు ప్రారంభించినట్లు పోలీసులు తెలిపారు.