బాత్ రూంలో బంగారం

Posted: 05/30/2015 10:34 AM IST

Officers hanover near four kage gold in shamshabad

అవును.. నిజమే బాత్ రూంలో బంగారం దొరికింది అది కూడా కొంచెం కాదు ఏకంగా నాలుగు కేజీల బంగారం. ఆశ్చర్యపోయారా..? కానీ ఇది నిజం. భూములను తవ్వితే ఖనిజమో ఏదో విలువైన వస్తువులో వస్తాయని విన్నాం కానీ బాత్ రూమ్ తవ్వితే ఏమొస్తుంది అంటే అందరు చెప్పే సమాధానం ముందు కంపు కొడుతుంది తర్వాత ఛండాలం వస్తుంది అని సమాధానం. కానీ అదే బాత్ రూంలో బంగారం దొరికితే ఎలా ఉంటుందో చెప్పండి. శంషాబాద్ ఎయిర్పోర్ట్లోని రాజీవ్ గాంధీ అంతర్జాతీయ విమానాశ్రయంలో డీఆర్ఐ అధికారులు నాలుగు కేజీల బంగారం దొరకడంతొ అధికారులు కూడా నోరెళ్లబెట్టారట. మస్కట్ నుంచి హైదరాబాద్ నగరానికి చేరుకున్న విమానంలోని బాత్రూంలో నాలుగు కేజీల బంగారాన్ని విమాన సిబ్బంది గమనించి... అనంతరం డీఆర్ఐ అధికారులకు వారు సమాచారం అందించారు. డీఆర్ఐ అధికారులు బాత్రూంలోని బంగారాన్ని స్వాధీనం చేసుకుని సీజ్ చేశారు. తనిఖీల్లో బంగారం పట్టుబడుతుందని భావించిన ప్రయాణికుడు భయపడి బాత్రూంలో వదిలేసి వెళ్లి ఉంటాడని డీఆర్ఐ అధికారులు అనుమానిస్తున్నారు.

చాలా కాలంగా శంషాబాద్ ఎయిర్ పోర్ట్ బంగారు గనిలా మారింది. అధికారులు సెర్చ్ చేసిన ప్రతిసారి ఎంతో కొంత బంగారం దొరకడం మామూలైపోయింది. అధికారులు బంగారు అక్రమ రవాణాను అడ్డుకోవడానికి ఎంతలా చర్యలు తీసుకుంటున్నా ఎలాంటి ప్రయోజనం కలగడం లేదు. తాజాగా మరోసారి నాలుగు కేజీల బంగారం దొరకడంతో పోలీసులు శరా మామూలులాగే కేసు నమోదు చేసి దర్యాప్తు చేస్తున్నారు. మే 26వ తేదీన దుబాయి నుంచి వచ్చిన ఓ ప్రయాణికుడి నుంచి 8 కేజీల బంగారాన్ని డీఆర్ఐ అధికారులు స్వాధీనం చేసుకున్నారు. అతడిని విచారించగా... బంగారం అక్రమ రవాణాకు శంషాబాద్ ఎయిర్ పోర్ట్లో సహకరిస్తున్న ఇద్దరు జీఎమ్ఆర్ ఉద్యోగుల పేర్లు వెళ్లడించాడు. దాంతో వారిని డీఆర్ఐ అధికారులు అరెస్ట్ చేశారు కూడా. అయితే శంషాబాద్ దొంగ బంగారానికి అడ్డాగా మారింది.

*అభినవచారి*