ధోని రిటైర్మెంటుపై బిసిసిఐ మాజీ కార్యదర్శి కీలకవ్యాఖ్యలు

Posted: 07/20/2019 12:09 PM IST

క్రికెట్ అభిమానులను విశేషంగా అలరించిన వరల్డ్ కప్ సంబరం ముగిసిందో లేదో.. ఇక టీమిండియా సెమీస్ లో వెనుదిరగటానికి కారణాలను అటుంచింతే.. అందరి దృష్టి మాత్రం టీమిండియా మాజీ సారధి.. మహేంద్ర సింగ్ ధోనిపైనే వుంది. అలా ఎందుకో చెప్పకుండానే మీరు గెస్ చేస్తున్నారని మాకు తెలుసు. మళ్లీ ధోని క్రికెట్ రిటైర్మంట్ గురించే క్రికెట్ వర్గాల్లో భారీఎత్తున్న చర్చ జరుగుతుందన్న విషయం తెలిసిందే. త్వరలో జరగనున్న వెస్టిండీస్ టూర్ కు ధోనిని ఎంపిక చేస్తారా? లేదా? అనే చర్చ కూడా జరుగుతోంది.

ఈ నేపథ్యంలో టీమిండియా మాజీ సెలెక్టర్ సంజయ్ జగ్దాలే కీలక వ్యాఖ్యలు చేశారు. ధోనికి మద్దతు పలుకుతూ ఆయన చేసిన వ్యాఖ్యలు ప్రస్తుతం చర్చనీయాంశంగా మారాయి. ధోనీ ఒక గొప్ప ఆటగాడని... నిస్వార్థంగా దేశం కోసం ఆడాడని జగ్ధలే కితాబిచ్చారు. ధోనీలాంటి వికెట్ కీపర్-బ్యాట్స్ మెన్ కు ప్రస్తుతం ప్రత్యామ్నాయం లేదని చెప్పారు. ప్రస్తుత పరిస్థితిలో ధోనీ స్థానాన్ని భర్తీ చేసే ఆటగాడు కనిపించడం లేదని తెలిపారు.

లిమిటెడ్ ఓవర్ల క్రికెట్ నుంచి ఎప్పుడు రిటైర్మెంట్ తీసుకోవాలని నిర్ణయించుకునే మెచ్యూరిటీ ధోనీకి ఉందని బీసీసీఐ సెక్రటరీగా కూడా పని చేసిన జగ్దాలే తెలిపారు. మధ్యప్రదేశ్ క్రికెట్ అసోసియేషన్ కు చెందిన ఒక అధికారి మాట్లాడుతూ, సరైన సమయంలో సరైన నిర్ణయం తీసుకునే పరిణితి ధోనీకి ఉందని చెప్పారు. సచిన్ టెండూల్కర్ విషయంలో వ్యవహరించిన మాదిరిగానే... ధోనీతో సెలెక్టర్లు మాట్లాడాలని, భవిష్యత్తుపై ఆయన ఆలోచనలు ఏ విధంగా ఉన్నాయో తెలుసుకోవాలని సూచించారు.