Posted: 07/21/2012 04:51 PM IST

టిడిపి సీడీ అస్త్రాన్ని ప్రయోగిస్తోంది. వైఎస్సార్ సీపీపై విమర్శల దూకుడు పెంచింది. రాష్ట్రపతి ఎన్నికల్లో కాంగ్రెస్ , వైఎస్సార్ కాంగ్రెస్ మ్యాచ్ ఫిక్సింగ్ అయ్యాయంటూ సీడీల్ని విడుదల చేసింది. ఈ సీడీలతో ప్రజల్లోకి వెళ్లాలని భావిస్తోంది. మొన్నటిదాకా మాటల తూటాలు.. ఇప్పుడు సీడీల అస్త్రం.. వైఎస్సార్ కాంగ్రెస్ మీద టిడిపి ఒంటికాలుపైలేస్తోంది. విమర్శల దూకుడుని పెంచింది.

రాష్ట్రపతి ఎన్నికల్లో కాంగ్రెస్ , వైఎస్సార్ కాంగ్రెస్ మ్యాచ్ ఫిక్సింగ్ అయ్యాయంటున్న టిడిపి ఇప్పుడు సీడీల రూపంలో ప్రజల్లోకి వెళ్లాలని నిర్ణయించింది. వైఎస్ జగన్, విజయమ్మ కాంగ్రెస్, సీబీఐల్ని విమర్శించిన ప్రసంగాలను టీడీపీ నేతలు విడుదల చేశారు. ఇలా మాట్లాడిన నేతలు వైఎస్ఆర్ సీపీ నేతలు రాష్ర్టపతి ఎన్నికల్లో యూపీయే అభ్యర్థి ప్రణబ్ కేలా ఓటు వేస్తారని టిడిపి ప్రశ్నిస్తోంది. కొన్ని రోజులుగా తెలుగుదేశం పార్టీ అధ్యక్షుడు చంద్రబాబుతో సహా పార్టీ నేతలంతా కాంగ్రెస్ పార్టీ ఒక విషవృక్షమైతే దాని కొమ్మ జగన్ అని విమర్శిస్తున్నారు. ప్రణబ్ కి జగన్ పార్టీ ఓట్లతో తాము ఇన్నాళ్లుగా చేస్తున్న ఆరోపణలు రుజువయ్యాయని టిడిపి అంటోంది. ఇక టిడిపి సంధించిన సీడీ అస్త్రానికి జగన్ పార్టీ ఎలా సమాధానం చెబుతుందో చూడాలి.