Posted: 03/20/2013 01:39 PM IST

భారత ఐటీ పరిశ్రమ 2016 నాటికి రూ.1.75 లక్షల కోట్లకు పెరుగుతుందని సీఐఐ-బోస్టన్ కన్సల్టింగ్ గ్రూప్(బీఎస్‌జీ) నివేదిక వెల్లడించింది. ఐటీ సర్వీసులు, సాఫ్ట్‌వేర్ సెగ్మెంట్లలో వృద్ధే దీనికి కారణమని ఈ నివేదిక పేర్కొంది. 2011లో రూ.99,700 కోట్లుగా ఉన్న ఐటీ పరిశ్రమ నాలుగేళ్లలో 12 శాతం చొప్పున వృద్ధి సాధిస్తూ రూ.1.75 లక్షల కోట్లకు చేరుతుందని వివరించింది.

2016 కల్లా ఐటీ సర్వీసుల రంగం 14% వృద్ధితో రూ.96,600 కోట్లకు, హార్డ్‌వేర్ రంగం 6% వృద్ధి చొప్పున రూ.44,400 కోట్లకు, సాఫ్ట్‌వేర్ ఉత్పత్తుల సెగ్మెంట్ 14% వృద్ధితో రూ.34,400 కోట్లకు చేరతాయని పేర్కొంది. ఈ ఆర్థిక సంవత్సరంలో భారత ఐటీ పరిశ్రమ 10 వేల కోట్ల డాలర్లకు చేరుతుందని అంచనాలున్నాయని ఈ నివేదికను విడుదల చేస్తూ మైక్రోసాఫ్ట్ కార్పొరేషన్ ఇండియా చైర్మన్ భాస్కర్ ప్రామాణిక్ చెప్పారు. ఇది జీడీపీలో 7.5 శాతమన్నారు. భారత అధిక వృద్ధి సాధనకు ఐటీ ఇతోధికంగా తోడ్పడుతుందని ఇన్ఫోసిస్ సహ వ్యవస్థాపకుడు, ప్రెసిడెంట్ ఎస్. గోపాలకృష్ణన్ చెప్పారు.