నిధుల మళ్లింపులో నిబంధనల ఉల్లంఘన వద్దు

Posted: 10/31/2014 10:13 PM IST

తెలంగాణ ప్రభుత్వానికి సమాచారం ఇవ్వకుండా ఆంధ్రప్రదేశ్ ప్రభుత్వానికి ఎలాంటి నిధులను బదలాయింపు చేయవద్దని బ్యాంకర్లకు తెలంగాణ ప్రభుత్వ ప్రధాన కార్యదర్శి రాజీవ్ శర్మ స్పష్టం చేశారు. బ్యాంకర్లతో జరిగిన సమావేశంలో విభజన, నిధుల బదలాయింపు, తదితర అంశాలపై రాజీవ్ శర్మ చర్చించారు. తమ ప్రభుత్వాన్ని సంప్రదించకుండా ఆంధ్రప్రదేశ్ ఖాతాల్లోకి నిధులు మళ్లింపు జరపవద్దని సూచించారు.
 
తెలంగాణ ప్రభుత్వ అనుమతి లేకుండా పదవ షెడ్యూల్ లోని సంస్థల బ్యాంక్ ల లావాదేవీలను నిర్వహించవద్దని ఆయన తెలిపారు. విభజనకు సంబంధించిన సంస్థలపై మూడు రోజుల్లో ఓ నివేదిక ఇస్తామని రాజీవ్ శర్మ తెలిపారు. కార్మికశాఖకు చెందిన ఉమ్మడి ఖాతాల్లోని నిధులు మళ్లింపుపై బ్యాంకర్లతో అయన సమీక్షించారు. నిధుల మళ్లింపులో నిబంధనల ఉల్లంఘన  చోటుచేసుకుందని, కొత్త ఖాతాల్లోకి అనధికారికంగా నిధులు తరలించారని పేర్కొన్నారు. విభజన చట్టంలోని నిబంధనలను బ్యాంకులు తప్పకుండా పాటించాలని.. వాటిని ఉల్లంఘించిన వారిపై కఠిన చర్యలు తీసుకోవాలని ఆదేశించారు.

జి.మనోహర్