Posted: 02/03/2013 12:13 PM IST

ముఖ్యమంత్రి నల్లారి కిరణ్ కుమార్ రెడ్డి, పీసీసీ అధ్యక్షుడు బొత్స సత్యనారాయణ మధ్య మళ్ళీ కోల్డ్ వార్ ప్రారంభం అయిందా అంటే అవుననే అంటున్నాయి రాజకీయ వర్గాలు. ఈ ఇద్దరు నేతలకు చెరో ఛానల్ ఉండడంతో వాటిలో వచ్చే కథనాలు వీరిద్దరి మధ్య విభేధాలను తారాస్థాయికి చేరవేశాయని అంటున్నారు. దీనికి తోడుగా వారి వర్గీయులు రంగంలోకి దిగి చేస్తున్న ప్రకటనలతో.. ఇద్దరి మధ్య విభేదాలు తారస్థాయికి చేరాయనే అభిప్రాయం కలుగుతుంది. బొత్స సత్యనారాయణ ఆకస్మికంగా తొమ్మిది మంది ఎమ్మెల్యేలను కాంగ్రెస్ నుంచి బహిష్కరిస్తున్నట్లు ప్రకటించడం ఈ వివాదానికి ఆజ్యం పోసింది. రాష్ట్రంలో కొనసాగుతున్నది మైనారిటీ ప్రభుత్వమని ఆయన చెప్పకనే చెప్పారు బొత్సా. లోతైన రాజకీయ వ్యూహంలో భాగంగానే బొత్స ఈ వ్యాఖ్యలు చేసినట్లు ప్రచారం జరుగుతోంది. ముఖ్యమంత్రికి సన్నిహితంగా మెలుగుతున్న పెడన ఎమ్మెల్యే జోగి రమేశ్ బొత్స వ్యాఖ్యలపై తీవ్రంగా స్పందించారు. ఇది కిరణ్ సర్కారుపై జరుగుతున్న కుట్రగా అభివర్ణించారు. సీఎం కుర్చీపై ఆశలు పెంచుకుని కిరణ్ సర్కార్‌ను కూల్చేందుకు ప్రయత్నిస్తున్నారంటూ ధ్వజమెత్తారు.

కిరణ్ వర్గానికి కౌంటర్ గా బొత్స వర్గం ఎమ్మెల్యే కారుమూరు నాగేశ్వరరావు తీవ్రంగా స్పందించారు.ముఖ్యంగా ఈ వివాదాలపై ముఖ్యమంత్రి కిరణ్ కు చెందిన చానల్ లో బొత్స వ్యతిరేక కధనాలకు ప్రాముఖ్యత లభిస్తున్న తీరుపై కొందరు అనుమానాలు వ్యక్తం చేస్తున్నారు.పైగా జోగి రమేష్ పార్టీ వదలి పెడతారని ఒక ప్రచారంతో పాటు, ఆయన కిరణ్ కు సన్నిహితంగా ఉంటారని మరో ప్రచారం సాగుతుండడం విశేషం. మొత్తానికి... ఈ వ్యవహారం రాష్ట్ర కాంగ్రెస్‌లో చర్చనీయాంశంగా మారింది. కిరణ్, బొత్సల మధ్య యుద్ధం ముదరడానికి కారణమేంటనే దిశగా ఆలోచిస్తున్నాయి రాజకీయ వర్గాలు. మరి వీరిద్దరి గొడవ ఎంత దూరం వెళుతుందో చూడాలి.