ఖైరతాబాద్ ఎమ్మెల్యే దానం నాగేందర్ కు ఆరు నెలల జైలు శిక్ష

Posted: 07/07/2021 07:15 PM IST

మాజీ మంత్రి, ఖైరతాబాద్ టీఆర్ఎస్ ఎమ్మెల్యే దానం నాగేందర్ కు నాంపల్లిలోని హైదరాబాద్ జిల్లా మెట్రోపాలిటిన్ క్రిమినల్ కోర్టు షాక్ ఇచ్చింది. ఆయనకు ఆరు నెలల పాటు జైలు శిక్షను విధించింది. అంతేకాదు ఆయన జరిమానాను కూడా విధించింది. తెలంగాణ ఉద్యమం ఉవ్వెతున్న సాగుతున్న నేపథ్యంలో ఆయన కారుకు అడ్డుగా వెళ్లిన ఓ వ్యక్తిని కర్రతో కొట్టి దాడి చేసిన కేసులో ఎమ్మెల్యే దానం నాగేందర్ కు నాంపల్లి ప్రజా ప్రతినిధుల కోర్టు ఆరు నెలల జైలు శిక్ష విధించడంతో పాటు వెయ్యి రూపాయల జరిమానా చెల్లించాలని ఆదేశించింది.

2013లో బంజారాహిల్స్ లో నమోదైన కేసులో దానం నాగేందర్ దోషిగా తేల్చి శిక్షను ఖరారు చేసింది. తన కారుకు అడ్డుగా వెళ్లిన వ్యక్తిపై ఆయన దాడి చేసి గాయపరిచారన్న కేసులో అభియోగాలు రుజువయ్యాయి. కాగా న్యాయస్థానం తమ తీర్పుపై దానం నాగేందర్ పై కోర్టులకు వెళ్లేందుకు.. అప్పీల్ చేసుకునేందుకు వీలుగా శిక్షను నెల రోజులపాటు నిలిపివేసింది. దానం నాగేందర్ పై కోర్టు ఇచ్చిన తీర్పుపై రాజకీయంగా సర్వత్రా విమర్శలు వెల్లువెత్తుతున్నాయి.