దారుణం: నేషనల్ ప్లేయర్ ను రేప్ చేశాడు

Posted: 07/18/2017 09:33 AM IST

దేశరాజధాని ఢిల్లీలో మరో ఘటన కలకలం రేపింది. జాతీయ స్థాయి కబడ్డీ క్రీడాకారిణిగా రాణిస్తున్న 16 ఏళ్ల క్రీడాకారిణి, తనపై అత్యాచారం జరిగిందంటూ పోలీసులకు ఫిర్యాదు చేసింది. ఓ పేరున్న క్రీడాకారుడే (35-40 ఏళ్ల మధ్య వయసు) తనపై అఘాయిత్యానికి పాల్పడ్డాడని ఆరోపించటం సంచలనంగా మారింది.

ఈ నెల 9వ తేదీన, ఓ క్రీడాకారుడు తనకు ఆహారం పానీయం ఇచ్చాడని, అది తీసుకున్నాక తాను స్పృహ కోల్పోగా, ఆపై ఈ ఘటన జరిగిందని తెలిపింది. అయితే తనకు ఏం జరిగిందో గుర్తు రావడం లేదని, ఓ పెద్ద గదిలో తాను అత్యాచారానికి గురైనట్టు వెల్లడించింది. ఫిర్యాదుతో రంగంలోకి దిగిన నార్త్ ఢిల్లీ పోలీసులు సీసీటీవీ కెమెరాలను పరిశీలించారు.

సదరు ఆటగాడు, బాధితురాలిని కారులో ఛత్రసల్‌ మైదానం నుంచి తీసుకెళ్లాడని తేల్చారు. ఆపై జూలై 10న ఆమెను ఓ బస్టాండ్‌ వద్ద వదిలేశాడని అధికారులు తెలిపారు. నిందితుడు బెదిరించటంతో తొలుత జరిగిన దురాగతాన్ని ఎవరికైనా చెప్పేందుకు భయపడ్డానని, చివరికి పోలీసులను ఆశ్రయించానని ఆమె పేర్కొంది. ఆమెను వైద్య పరీక్షల నిమిత్తం ఆసుపత్రికి పంపించామని, కేసును విచారిస్తున్నామని పోలీసులు వెల్లడించారు. అయితే ఇప్పటికే నిందితుడిని అదుపులోకి తీసుకున్నట్లు సమాచారం అందుతోంది.