ఏపికి సింగపూర్.. తెలంగాణకు డల్లాస్ పేటెంట్ హక్కులు

Posted: 04/28/2015 12:16 PM IST

తెలుగు రాష్ట్ర విడిపోయి రెండు రాష్ట్రాలుగా విడిపోయిన తర్వాత రెండు రాష్ట్రాల ముఖ్యమంత్రులు తమ రాష్ట్రాన్ని అలా మారుస్తాం ఇలా మారుస్తాం అంటూ బీరాలు పోతున్నారు. ఫలానా దేశంలో అభివృద్ది సూపర్ అందుకే మన దగ్గర వారి కన్నా బంపర్ చేసి చూపిద్దాం అంటూ మీడియా ముందు తెగ వాగుతున్నారు. ఏపి ముఖ్యమంత్రి ముందు నుండి హైటెక్ ముఖ్యమంత్రిగా పేరుంది. అన్ని దేశాలను తిరగి అక్కడి కొత్త టెక్నాలజీని వాడుకోవడం.. అక్కడి పారిశ్రామికవేత్తలకు రెడ్ కార్పెట్ పర్చడం నారా చంద్రబాబు నాయుడుకు తెలిసినంతగా ఎవరికీ తెలియదేమో. అయితే తెలుగు రాష్ట్రం విడిపోయి ఏపి, తెలంగాణ ప్రత్యేక రాష్ట్రాలుగా ఏర్పడిన తర్వాత చంద్రబాబు తెగ సింగపూర్ జపం చేస్తున్నారు. ఎంతలా అంటే ప్రతి విషయాన్ని సింగపూర్ తో పోలుస్తున్నారు. సింగపూర్ లో పరిశ్రమలకు అనుమతులు ఇలా ఇస్తారు.. సింగపూర్ లో రోడ్ల వ్యవస్థ ఇలా ఉంటుందని.. ఏకంగా మన మంత్రులకు కూడా అసలు ఏపిలో ఉన్నామా లేక సింగపూర్ లో ఉన్నామా అన్న అనుమానం కలిగేలా చంద్రబాబు వ్యవహరిస్తున్నారు.

తెలుగు రాష్ట్రాలుగా విడిపోయిన తర్వాత తెలంగాణ ముఖ్యమంత్రి ఏపి ముఖ్యమంత్రి నారా చంద్రబాబు నాయుడు చేసే ప్రతి పనికి ఏదో రకంగా సమాధానం ఇస్తున్నారు. అయితే ఏపి సిఎం ఏకంగా సింగపూర్ కలను ప్రజలకు చూపిస్తు.. అక్కడి వారిని ఊహాలోకంలోకి తీసుకెళుతున్నారు. అందుకే కాబోలు తెలంగాణ ముఖ్యమంత్రి కూడా సింగపూర్ పేరు కాకుండా వేరే ధీటైన నగరాన్ని ప్రతిపాదిస్తున్నారు. డల్లాస్ లాగా హైదరాబాద్ నగరాన్ని సుందరంగా తయారు చేస్తామని అంటున్నారు. అంతేనా ఇప్పటికే అక్కడి రవాణా వ్యవస్థను కాపీ కొట్టిన కేసిఆర్ భవిష్యత్ లో మరి ఎన్ని కాపీలు కొడతారో చూడాలి. మొత్తానికి ఏపి ముఖ్యమంత్రి సింగపూర్ నినాదం, తెలంగాణ ముఖ్యమంత్రి డల్లాస్ విధానం ఎంత వరకు లాభం చేకూరుస్తాయో చూడాలి.

*అభినవచారి*