సల్మాన్ ఖాన్ హిట్ అండ్ రన్ కేసు.. 20న తీర్పు

Posted: 04/18/2015 09:44 PM IST

Salman khan hit and run case court to deliver final verdict on 2oth

బాలీవుడ్ కండల వీరుడు సల్మాన్ ఖాన్ హిట్ అండ్ రన్ కేసులో ఈ నెల 20న ముంబై న్యాయస్థానం తుది తీర్పును వెలువరించనుంది. సర్వోన్నత న్యాయస్థానం అదేశం మేరకు మరోమారు సల్మాన్ ఖాన్ సహా అతని తరపున కేసులో ప్రత్యక్షంగా ప్రమేయమున్న వారందరి వాంగ్మూళాలను విన్న న్యాయస్థానం.. సోమవారం తుది తీర్పును వెలువరించనుంది. 2002 సెప్టెంబర్ 28న బాంద్రాలో నిద్రిస్తున్న ఐదుగురిపై నుంచి సల్మాన్ ప్రయాణిస్తున్న కారు వెళ్లింది. ఈ ప్రమాదంలో ఒకరు మృతి చెందగా... మరో నలుగురు తీవ్రంగా గాయపడిన సంగతి తెలిసిందే. దాదాపు 13 ఏళ్లగా ఈ కేసు కోర్టులో విచారణ జరగుతుంది. 27 మంది సాక్షులను కోర్టు ఈ సందర్భంగా విచారించింది.

నిన్నసల్మాన్ ఖాన్ న్యాయవాది శ్రీకాంత్ శివాదే వాదనలను కూడా న్యాయస్తానం విన్న అనంతరం ఆయన మీడియాతో మాట్లాడుతూ తీర్పు స్మలాన్ ఖాన్ కు సానుకూలంగా వుండే అవకాశాలే అధికంగా వున్నాయని చెప్పారు. ప్రమాదం జరిగిన రోజున తన లాండ్ క్రూసెర్ కారులో హిల్ రోడ్డు నుంచి వస్తున్న సల్మాన్ ఖాన్ కారు టైరు పేలడంతో కారు పేవ్ మెంట్ మీదకు వెళ్లడంతోనే ఘటన జరిగిందని ఆయన చెప్పారు. ఇందుకు బిన్నంగా ఒక్క సాక్ష్యాన్ని కూడా ఇప్పటి వరకు ప్రాసిక్యూషన్ తరుపు న్యాయవాదులు ప్రవేశపెట్టలేదని చెప్పారు. దీనికి తోడు సల్మాన్ ఖాన్ కారు డ్రైవర్ అశోక్ సింగ్.. తానే ఈ కారు నడిపానని, ప్రమాద సమయంలోనూ కారును తానే తోలుతున్నానని కోర్టుకు తెలిపాడని చెప్పారు. వీటి ఆధారంగా తీర్పు సల్మాన్ ఖాన్ కు సానుకూలంగా వుంటుందని ఆయన అశాభావం వ్యక్తం చేశారు. అయితే హిట్ అండ్ రన్ కేసులో సల్మాన్ ఖాన్ కు వ్యతిరేకంగా కోర్టు తీర్పును వెలువరించిన పక్షంలో ఆయనకు పదేళ్ల కాలం పాటు జైలు శిక్ష పడే అవకాశాలున్నాయని న్యాయనిపుణులు అంటున్నారు.

జి.మనోహర్