Posted: 03/19/2013 10:07 AM IST

హైద్రాబాద్ లోని కీసరగుట్ట అతి ప్రాచీన మైన శివాలయం.  అయితే ఈ క్షేత్రంలో జరగవలసినంత అభివ్రుద్ది­­­­ జరగలేదు.  శివరాత్రికి తప్పితే మిగతా పురాతన ఆలయాల్తో పోల్చి చూస్తే పెద్దగా భక్తుల సందర్శించినట్లుగా కనపడదు.  ప్రధానాలయంలోని అర్చనలందుకునే శివలింగం కాక, ఆలయ ప్రాంగణంలో వందలాది శివలింగాలు దర్శనమిస్తాయి. 

అటువంటి ఈ క్షేత్రానికి లక్షలలో భక్తుల సందర్శనయోగం కలగబో­­­­­­తోంది.  ఈ క్షేత్రం ఖండాంతర వ్యాప్తిగా పేరుగాంచటానికి అవకాశం కలుగబోతోంది.  ఇక్కడ ఏప్రిల్ 13 నుంచి 24 వరకు జరగబోతున్న అతిరాత్ర మహాయాగమే అందుకు కారణం.  ఈ అతిరాత్ర మహాయాగాన్ని సందర్శించటానికి 20 లక్షల పై చిలుకే వస్తారని అంచనా వేస్తున్నట్టుగా ఆలయ ఛైర్మన్ టి.నారాయణ శర్మ అన్నారు.    ముఖ్యమంత్రి కిరణ్ కుమార్ రెడ్డి కూడా ఒకరోజు యాగాన్ని సందర్శిస్తారని తెలియజేసారు.

ఈ పుణ్యకార్యానికి పూనుకున్న తాత్త్విక హైందవ ప్రచారక సమితి (తపస్) మేనేజింగ్ ట్రస్టీ డా. శివకరణ్ నంబూద్రి మాట్లాడుతూ ఈ యాగం ద్వారా ఈ క్షేత్రానికి ఎంతో ఖ్యాతి కలుగబోతోందని అన్నారు.  ఇప్పటికే కేరళ నుంచి వచ్చిన వేదపండితులు ఈ కార్యక్రమానికి భూమి పూజతో నాంది పలికారు.  ఆ తర్వాత యాగశాల నిర్మాణ స్థలంలో పతాకాన్ని ఎగురవేసారు.  అహితాగ్ని చెరుముక్కు వల్లభన్ సోమయాజిపద్ ఈ యాగానికి యజమానిగా వ్యవహరిస్తారని కూడా తెలియజేసారు.

 

-శ్రీజ