Posted: 12/16/2011 10:16 AM IST

రాష్ట్ర చేనేత, జౌళీ శాఖ మంత్రి, కంటోన్మెంట్ ఎమ్మెల్యే, వివాదాల మంత్రిగా పేరొందిన శంకర్రావు ముఖ్యమంత్రి పై విమర్శలు, సెటైర్లు వేయడం మాత్రం మానుకోవడంలేదు. జూబ్లిహాలులో జరుగుతున్న కలెక్టర్ల సమావేశంలో కూడా ముఖ్యమంత్రిపై సెటైర్లు వేశారు. సమస్యలపై మాట్లాడదామంటే అధికారులు సమయానికి దొరకట్లేదని మంత్రి శంకర్‌రావు వాపోయారు. "హైదరాబాదీలు ఉదయం పదయితే గానీ లేవరు... రాత్రి ఏడు దాటితే దొరకరు. ఇది నాకు ఇబ్బందికరంగా ఉంది. మా పాలమూరికి వెళ్లిపోతా'' అని ఆయన వ్యాఖ్యానించారు. తాను హైదరాబాదీనే అని చెబుతున్న సీఎంకూ ఇది వర్తిస్తుందా అని విలేకరులు ప్రశ్నించారు. దానికి.. "ఏం.. ముఖ్యమంత్రి కిరణ్ ఎక్కడ పుట్టాడు? ఎక్కడ పెరిగాడు? ఎక్కడ చదివాడు? హైదరాబాద్‌లో కాదా? ...'' అని వ్యంగ్యాస్త్రం వదిలారు.
దీనికి అక్కడున్న విలేఖరులు ఒక్కసారిగా ఆశ్చర్యపోయారు. ఈయన ఎక్కడున్నా ఇలాంటి వ్యాఖ్యలు చేయడం మామూలేనని అనుకున్నారు.

జూబ్లిహాలులో జరుగుతున్న సమావేశం మన మంత్రులకు మంచి వినోద ప్రాంతంగా ఉంది. ఇక్కడికి అందరు మంత్రులు రావడంతో ఆ సమావేశం ‘గెట్ టుగెదర్’ లాగా తయారయింది. సమస్యలపై చర్చించడం తక్కువ – తిండి గురించి ఆలోచించడం ఎక్కువ’’ గా ఉంది అక్కడి పరిస్థితి.  శంకర్‌దాదా ఎంబీబీఎస్... రాగి సంకటి, నాటు కోడి పులుసు రుచిచూశావా..? అని మంత్రి రఘువీరా రెడ్డి శంకర్ రావును అడిగాడు. అందుకు ఆయన . నాటు కోడి పులుసు... రాగి సంకటి రుచి చూశా కానీ... నేను దొంగ డాక్టర్‌ను కాదు. అసలైన డాక్టర్‌ను. కావాలంటే నా సర్టిఫికెట్ చూపిస్తా అంటూ శంకర్‌రావు వ్యాఖ్యానించారు. పనిలో పనిగా వీరితోపాటు ఉన్న మరో మంత్రి శైలాజానాథ్ కూడా తామంతా శంకర్‌దాదా ఎంబీబీఎస్‌లం కాదని...ఒరిజినల్ డాక్టర్లమంటూ వ్యాఖ్యానించారు. సమావేశాలు నిర్వహించమంటే సరదాగా కబుర్లు చెప్పుకుంటున్నారు ప్రజాప్రతినిధులు అని ప్రజలు అనుకుంటున్నారు.