క్రికెట్ కు గుడ్ బై చెప్పేస్తానంటున్న సఫారీల కెప్టెన్..!

Posted: 11/16/2018 05:13 PM IST

దక్షిణాఫ్రికా కెప్టెన్ డుప్లెసిస్ అంతర్జాతీయ టీ20 క్రికెట్‌కి మరో రెండేళ్లలో రిటైర్మెంట్ ప్రకటించబోతున్నట్లు వెల్లడించాడు. ఆస్ట్రేలియా గడ్డపై దక్షిణాఫ్రికా టీమ్ రేపు ఆఖరి టీ20 మ్యాచ్ ఆడనున్న నేపథ్యంలో.. తాజాగా మీడియాతో మాట్లాడిన డుప్లెసిస్‌.. 2020లో జరగనున్న టీ20 ప్రపంచకప్‌తో తాను అంతర్జాతీయ టీ20లకి వీడ్కోలు పలకనున్నట్లు స్పష్టం చేశాడు.

జనవరి 2011లో భారత్‌తో జరిగిన వన్డే మ్యాచ్‌తో అంతర్జాతీయ క్రికెట్‌లోకి అరంగేట్రం చేసిన డుప్లెసిస్ ఏడాది వ్యవధిలోనే టెస్టు, టీ20 జట్టులో స్థానం సంపాదించాడు. ఈ ఆరేళ్ల టీ20 కెరీర్‌లో ఇప్పటి వరకు 41 మ్యాచ్‌లు ఆడిన ఈ మిడిలార్డర్ బ్యాట్స్‌మెన్ 1,237 పరుగులు చేశాడు. ఇందులో 7 అర్ధశతకాలు ఉండగా.. 114 ఫోర్లు, 40 సిక్సర్లు ఉండటం అతని దూకుడుకి నిదర్శనం.

అంతర్జాతీయ టీ20లకి రిటైర్మెంట్ ప్రకటించినా.. ఐపీఎల్‌‌లో డుప్లెసిస్‌ ఆడే అవకాశం ఉంది. 2018 సీజన్‌లో చెన్నై సూపర్ కింగ్స్ ఆడిన ఈ హిట్టర్ ఒంటిచేత్తో మ్యాచ్‌లు గెలిపించిన సందర్భాలు ఉన్నాయి.