పేగుబంధాన్ని కలపిన ఆధార్..

Posted: 11/13/2014 12:28 PM IST

Aadhaar card helps mother trace son lodged in goa prison

వున్నాడో, లేడో తెలియని కొడుకు.. తిరిగి వస్తాడని ఆ ఎనభై ఏళ్ల కురువృద్దురాలు. పెట్టుకున్న ఆశలను నిజం చేసింది ఆధార్ కార్డు. కొడుకు కోసం 16 ఏళ్లుగా కళ్లు కాయలు కాచేలా ఎదురు చూసిన ఆమె ఆధార్ కార్డు సాయంతో అతని ఆచూకీ కనుగొంది. కేరళ లోని శ్రీమూలనగరం గ్రామానికి చెందిన కల్యాణి... మూడో కొడుకు వీవీ మోహన్ 16 ఏళ్ల కిందట పనికోసం గోవా వెళ్లాడు. అప్పటికే భర్త, ఇద్దరు కొడుకులను కోల్పోయిన కల్యాణి.. తన మూడో కొడుకు కోసం కళ్లు కాయలు కాచేలా ఎదురుచూస్తుంది. గ్రామంలోని వారు 16 ఏళ్లుగా రాని వాడు ఇప్పుడెందుకు వస్తాడని ఎంత చెప్పినా..అమె తన ఆశలను వదులుకోలేదు.

శిథిలావస్థకు చేరుకున్న తన ఇంట్లోనే గడుపుతూ, ఇరుగుపొరుగు వారు పెట్టే భోజనంతో రోజులు వెళ్లదీస్తోంది. వయసు పైబడినా, కంటిచూపు తగ్గినా ఆశ మాత్రం వదులుకోలేదు. ఇటీవల ఆమె ఇంటికి పోస్టులో ఓ కవరు వచ్చింది. దాన్ని ఆమె గ్రామ పంచాయతీ అధ్యక్షుడు కేసీ మార్టిన్ వద్దకు తీసుకెళ్లింది. కవర్ తెరిచి చూడగా అందులో మోహన్ ఆధార్ కార్డు కనిపించింది. కల్యాణి బంధువులు, పొరుగువారు శతవిధాలా ప్రయత్నించి అతని ఆచూకీ కనుగొన్నారు. మోహన్ ఓ హత్యకేసులో 13 ఏళ్ల నుంచి గోవాలోని అగౌదా జైల్లో ఉంటున్నట్లు తెలుసుకున్నారు. గత వారం జైలుకు వెళ్లి అతన్ని కలుసుకుని తల్లి పరిస్థితి గురించి చెప్పారు. అతడు తల్లిని చూసేందుకు వీలుగా పెరోల్ కోసం సన్నాహాలు చేస్తున్నామన్నారు. మొత్తానికి ఆధార్ కార్డుతో పేగుబంధం కలుస్తున్నందుకు ఆ గ్రామం అంతా సంతోషంగా వుంది.

జి మనోహర్