ఆమ్మ ఆస్తులపై కోర్టు తీర్పు నేడే..

Posted: 09/27/2014 07:43 AM IST

తమిళనాడు ముఖ్యమంత్రి జయలలిత అక్రమాస్తుల కేసులో ఇవాళ తీర్పు వెలువడనుంది. బెంగళూరు ట్రయల్ కోర్టు ఈ కేసులో తీర్పును వెల్లడించనుంది. 1991-96మద్య తమిళనాడు ముఖ్యమంత్రిగా ఉన్న జయలలిత రూ.60కోట్లకు పైగా అక్రమంగా ఆస్తులు సంపాదించారని ఆరోపణలు ఎదుర్కుంటున్నారు. 18ఏళ్ళ క్రితం అంటే 1996లో నమోదైన కేసులో సుదీర్ఘ విచారణల తర్వాత ఇవాళ తీర్పు వెలువడనుంది. ఈ తీర్పుపై తమిళనాడు ప్రజల్లో ఉత్కంఠ నెలకొంది. సెంటిమెంట్లకు తమిళ ప్రజలు అధిక ప్రాధాన్యం ఇచ్చేవారు కావటంతో.. రాష్ర్టంలొ సున్నిత పరిస్థితులు నెలకొన్నాయి. అటు ఈ పరిస్థితుల దృష్యా తీర్పును వాయిదా వేయాలన్న పిటిషన్ ను శుక్రవారమే సుప్రీంకోర్టు తోసిపుచ్చింది.

కేసుపై ప్రజల్లో నెలకొన్న ఉత్కంఠ దృష్యా తీర్పు ఇవ్వనున్న ట్రయల్ కోర్టు పరిసరాల్లో మూడంచెల భద్రతను ఏర్పాటు చేశారు. న్యాయమూర్తులు, న్యాయవాదులు కేసుకు సంబందించిన వ్యక్తులు మినహా కోర్టు లోపలికి ఎవరిని అనుమతించటం లేదు. కోర్టు చుట్టూ మూడంచెల భద్రతను ఏర్పాటు చేశారు. తీర్పును తెలుసుకునేందుకు వచ్చే ప్రజల కోసం ప్రత్యేక ఎన్ క్లోజర్, మీడియా  ప్రతినిధులు, లాయర్ల కోసం వేర్వేరుగా రెండు ఎన్ క్లోజర్లు ఏర్పాటు చేశారు. అటు చెన్నైలో కూడా పోలిసులు పటిష్ట బందోబస్తు ఏర్పాటు చేశారు. సున్నిత ప్రాంతాల్లో ఎలాంటి అవాంచనీయ ఘటనలు జరగకుండా అదనపు బలగాలను మోహరించారు. అమ్మ ఆస్తులపై కోర్టు ఏమని తీర్పు ఇస్తుందో చూడాలి.

 

కార్తిక్