హస్తినకెళ్ళిన నరసింహన్

Posted: 08/20/2014 11:01 AM IST

రెండు తెలుగు రాష్ర్టాల తొలి గవర్నర్ నరసింహన్ ఢిల్లీకి వెళ్ళారు. రెండ్రోజుల పర్యటనలో భాగంగా ఈ ఉదయం హస్తినకు వెళ్ళారు. చాలా రోజుల తర్వాత రాజధానికి వెళ్తున్న నరసింహన్ ప్రభుత్వ పెద్దలను కలుస్తారని తెలుస్తోంది. పర్యటనలో రాష్ర్టపతి ప్రణబ్ ముఖర్జీ, ప్రధాని నరేంద్ర మోడి, హోంమంత్రి రాజ్ నాధ్ సింగ్ సహా ఇతర ముఖ్య నేతలను గవర్నర్ కలుస్తారని సమాచారం. వీరితో రెండు రాష్ర్టాల్లో ప్రస్తుతం ఉన్న పరిస్థితులు, శాంతిభద్రతలు ఇతర అంశాలపై చర్చిస్తారు. రాష్ర్టంలోని తాజా పరిస్థితులపై కేంద్రానికి నెలకోసారి నివేదిక పంపటం గవర్నర్ బాధ్యత.

తాజా పర్యటనలో తెలంగాణ ప్రభుత్వ సమగ్ర కుటుంబ సర్వే ప్రస్తావన తెస్తారని తెలుస్తోంది. సర్వేపై వివాదాలు, కోర్టు ఆదేశాలు, సర్వే వల్ల జరిగే పరిణామాలను కేంద్రానికి వివరించనున్నారు. తెలంగాణలో నెలకొన్న రాజకీయ, పాలనా పరిస్థితులు, ప్రభుత్వ విధానాలు, నిర్ణయాలను కేంద్రానికి తెలుపుతారు. అంతేకాకుండా హైదరాబాద్ లో శాంతిభద్రతలు, విభజన వల్ల జరుగుతున్న పరిణామాలను కూడా కేంద్రానికి తెలియజేస్తారు. అటు ఏపీలో ప్రస్తుత పరిస్థితులు, పాలనా నిర్వహణపై కేంద్రానికి నివేదిక ఇచ్చే అవకాశముంది. వీటితో పాటు తెలంగాణ ప్రభుత్వంపై వివిధ పార్టీల నేతలు ఇటీవల తనకు సమర్పించిన ఫిర్యాదులు, నివేదికలను కూడా నరసింహన్ కేంద్రం దృష్టికి తీసుకెళ్తారు.  

 

కార్తిక్