సింగరేణిని కొనుక్కుంటే, సాధ్యాసాధ్యాల అధ్యయనం

Posted: 07/22/2014 09:51 AM IST

ఖమ్మం జిల్లా కొత్తగూడెం ప్రధాన కార్యాలయంగా పనిచేస్తున్న సింగరేణి బొగ్గు గనులు ఖమ్మం జిల్లాలోనే కాక కరీం నగర్ జిల్లాలో కూడా ఉన్నాయి.  తెలంగాణాలో బొగ్గు తెలంగాణాలోనే ఉపయోగించుకునేట్లుగా చేసుకుంటే ఎలా ఉంటుందన్న ఆలోచన తెలంగాణా సర్కార్ కి వచ్చింది.  విద్యుదుత్పానలో బొగ్గు బంగారంగా మారి విదేశాల నుంచి కూడా దిగుమతి చేసుకుంటున్న సమయంలో సింగరేణి బొగ్గుని పూర్తిగా మనది చేసుకుంటే అనే ఆలోచన సామాన్యమైంది కాదు కదా, అందుకే సాధ్యాసాధ్యాల మీద అధ్యయనం మొదలైంది.
ప్రస్తుతం కేంద్ర ప్రభుత్వం, రాష్ట్ర ప్రభుత్వం 51, 49 శాతాల వాటాలతో నడుస్తున్న సింగరేణి కోల్ మైన్స్ ని పూర్తిగా రాష్ట్ర ఆధీనంలోకి తీసుకోవాలంటే రాష్ట్ర ప్రభుత్వం మిగిలిన 49 శాతం వాటాను కూడా కొనుక్కోవలసివుంటుంది.  అందుకు కేంద్ర ప్రభుత్వం అంగీకరించవలసికూడా ఉంటుంది.  అయితే కేంద్ర ప్రభుత్వం వాటాలను ఉపసంహరించుకోవాలనే ప్రతిపాదన వచ్చిన నేపథ్యంలో దాన్ని అధ్యయనం చేస్తూ రాష్ట్ర ముఖ్యమంత్రి కె చంద్రశేఖరరావు సోమవారం నాడు అధికారులతో సుదీర్ఘంగా చర్చించారు.  
ఇదే జరిగితే తెలంగాణా రాష్ట్ర ప్రభుత్వం సింగరేణి బొగ్గును యధేచ్చగా వాడుకుంటూ రాష్ట్ర విద్యుత్ అవసరాలకు మేర ఉత్పాదనను పెంచుకోగలుగుతుంది.  ప్రస్తుతం రాష్ట్రానికి ఉన్న వాటా ఎక్కువే అయినా, బొగ్గు కేటాయింపులు మాత్రం పూర్తిగా కేంద్ర ప్రభుత్వం చేతుల్లో ఉండటం వలన తెలంగాణాలో బొగ్గు మీద తెలంగాణాకు అధికారాలు లేకపోవటం, కేవలం లాభాల్లో వాటాలు మాత్రమే ఉండటం సరికాదని కెసిఆర్ ఆలోచన.  దానితో పాటుగా విదేశాలనుంచి కూడా బొగ్గుని దిగుమతి చేసుకుని రాష్ట్రంలో విద్యుత్ కొరత లేకుండా చెయ్యాలన్నిది కెసిఆర్ ప్రభుత్వం ఆలోచన.  ఈ మొత్తం ప్రణాళికకు ఎన్ని నిదులు కావాలి, ఎలా సమకూర్చుకోవాలన్న చర్చలు జరుగుతున్నాయి.
-శ్రీజ