రెండో పౌరుడిగా బతికే పరిస్థితి రానీయకండి

Posted: 08/16/2013 10:08 AM IST

సీమాంధ్రలో రోజు రోజుకు ఉద్యమం ఉవ్వెత్తున ఎగిసిపడుతోంది. సీమాంధ్రలో ఉన్న ప్రజలు ప్రవాహంలో రోడ్ల పైకి వచ్చి ఆందోళనలు చేస్తున్నారు. ఈ నేపథ్యంలో సీమాంధ్ర ప్రాంతానికి చెందిన కేంద్రమంత్రులు పలువురు ఆంటోని కమిటీకి తన గోడును వెల్లబోసుకున్నారు. గురువారం రాత్రి సుమారు గంటన్నరకు పైగా సాగిన ఈ సమావేశంలో మంత్రులు కమిటీ వద్ద రాష్ట్రాన్ని సమైక్యంగా ఉంచాలని, ఈ పార్లమెంటు సమావేశాలు ముగిసేలోపు సీమాంధ్ర ప్రజలను శాంత పరిచే విధంగా ఏదో ఒక ప్రకటన చేయాలని వారు కమిటీకి విన్నమించారు. సీమాంధ్రలో ఎలాంటి నాయకత్వం లేకుండా ప్రజలు రోడ్లపైకి వచ్చి ఆందోళనలు చేస్తున్నారని, ఏపీ ఎన్జీవోల బంద్ వల్ల ఉద్యమం మరింత తీవ్ర రూపం దాల్చిందని, మరి కొన్ని రోజులు ఆగితే పరిస్ధితులు అదుపు తప్పే అవకాశాలు ఉన్నాయని వారితో చెప్పారు. ముఖ్యంగా కేంద్ర పర్యాటక శాఖ మంత్రి చిరంజీవి కమిటీకి చెప్పిన కొన్ని విషయాలు కమిటీ ఆసక్తి కరంగా విన్నట్లు సమాచారం. హైదరాబాద్ ను కోల్పోవడం సీమాంధ్రలకు ఏ మాత్రం ఇష్టం లేదని, సీమాంధ్రులకు హైదరాబాద్ తో భావోద్వేగాలు ముడిపడి ఉన్నాయని, తాను చెన్నైలో ఉన్నప్పుడు రెండో పౌరుడిగానే బతికానని, ఇప్పడు రాష్ట్రాన్ని విడదీసి హైదరాబాద్ లో రెండో పౌరుడిగా బతికే పరిస్థితి నాకు, సీమాంధ్ర ప్రజలకు రానీయకండి ఆయన కమిటీకి చెప్పినట్లు సమాచారం. మొత్తానికి కేంద్ర మంత్రులు ఆంటోనీ కమిటీకి తమ వాదలను బలంగా వినిపించినట్లు తెలుస్తుంది. ఈ కేంద్ర మంత్రుల సమావేశం అసంపూర్ణంగానే ముగిసింది, తిరిగి 19, 20 తేదీల్లో జరుగుతుంది. ఆ తరువాత రాష్ట్ర వ్యవహారాల ఇంచార్జి దిగ్విజయ్ సింగ్ రాష్ట్రానికి వచ్చి సమస్యలను ఆలకిస్తారని కేంద్ర మంత్రులు తెలిపారు. అంత వరకు సీమాంధ్రుల శాంతంగా ఉండాలని సూచించారు.