ఎల్లుండి నుంచే పాత నోట్లు పనికిరావు

Posted: 12/01/2016 11:14 AM IST

పాత నోట్ల రద్దుతో ఇక్కట్లు ఎదుర్కుంటున్న ప్రజలకు కాస్త ఇబ్బంది కలిగించే వార్త ఇది. డిసెంబర్ 2 అర్థరాత్రి నుంచి 500 రూపాయల నోట్లు పెట్రోల్ బంక్ లలో కూడా చెల్లకుండా ప్రభుత్వం నిర్ణయం తీసుకుంది. మరికాసేపట్లో దీనికి సంబంధించి ఓ అధికారిక ప్రకటన వెలువరించింది. ఇప్పటికే 1000 నోటు చెల్లకుండా, కేవలం ఆర్బీఐ బ్రాంచ్ లలోనే మార్చుకోవాలని ఆదేశాలు జారీ చేసిన విషయం తెలిసిందే.

ముందు డిసెంబర్ 15 వరకు అవి చెల్లుబాటు అవుతాయని చెప్పినప్పటికీ, ప్రస్తుతం కొత్త కరెన్సీ దాదాపు అందరికీ అందుబాటులోకి రావటంతో ఈ నిర్ణయం తీసుకున్నట్లు ప్రభుత్వం వెల్లడించింది. నోట్ల రద్దు అనంతరం పాత నోట్లు కొన్ని కొన్ని ప్రాంతాల్లో మాత్రం చెల్లుబాటు అయ్యేలా ఆర్బీఐ వెసులు బాటు కల్పించి, ఆపై రాను రాను ఆ నిబంధనలను కఠినతరం చేస్తూ వచ్చింది. ప్రస్తుత నిర్ణయంతో డిసెంబర్ 3 నుంచి పెట్రోల్ బంకులతోపాటు ఎయిర్ పోర్ట్ లలో కూడా పాత 500 నోట్లు చెల్లవు. ఇక రూ. 1000, రూ. 500 కాగితాలు ఎవరి వద్దనైనా ఉంటే వాటిని బ్యాంకుల్లో డిపాజిట్ చేయక తప్పనిసరి పరిస్థితి. కాగా, రూ. 500 కాగితాలతో కరెంటు బిల్స్ వంటివి మాత్రం చెల్లించే అవకాశం మరో రెండు వారాలు కొనసాగనుంది.

ఇక నోట్ల ర‌ద్దు పుణ్య‌మా అని వాహ‌న‌దారుల‌కు గ‌త 20 రోజులుగా టోల్ ట్యాక్స్ కట్టే బాధ త‌ప్పిన విషయం తెలిసిందే. నవంబర్ 11 నుంచి టోల్ టాక్స్ ను రద్దు చేస్తూ ఆ పై పలుమార్లు పొడిగించుకుంటూ వచ్చింది. ఇక డిసెంబర్ 2వ తేదీ అర్ధరాత్రి దాటాక‌ మ‌ళ్లీ వాహ‌న‌దారులు య‌థావిధిగా టోల్ ట్యాక్స్ క‌ట్టాల్సిందే. అయితే చిల్ల‌ర సంక్షోభం మ‌రోమారు త‌లెత్త‌కుండా ఉండేందుకు ఈనెల 15 వ‌ర‌కు ర‌ద్ద‌యిన పాత రూ.500 నోట్ల‌ను అనుమ‌తించాల‌ని ఆదేశాలు జారీ చేసింది. అలాగే టోల్ కౌంట‌ర్ల వ‌ద్ద ఎస్‌బీఐ కార్డు స్వైపింగ్ యంత్రాల‌ను ఏర్పాటు చేసింది.