టిఎస్పిఎస్ గ్రూప్ 2 రీనోటిఫికేషన్

Posted: 05/05/2016 02:19 PM IST

ఇప్పటికే చాలా సార్లు వాయిదా పడిన గ్రూప్‌-2 పరీక్షకు త్వరలోనే రీనోటిఫికేషన్‌ జారీ కానుంది. 2016లో డిగ్రీ పరీక్షలు రాసిన వారి కోసం తెలంగాణ పబ్లిక్‌ సర్వీస్‌ కమిషన్‌ రీనోటిఫికేషన్‌ను జారీ చేయాలని ఆలోచిస్తోంది. ప్రభుత్వం నుంచి పోస్టులపై స్పష్టత రాగానే రీనోటిఫికేషన్‌ జారీ చేయడం కోసం కమిషన్‌ ఏర్పాట్లు చేస్తున్నట్లు సమాచారం. రీ నోటిఫికేషన్‌లో పరీక్షను ఎప్పుడు నిర్వహిస్తారో కూడా ప్రకటించే అవకాశం ఉన్నట్టు తెలుస్తోంది. వివిధ పీజీ సెట్లకు ప్రిపేర్‌ అయ్యే వారు గ్రూప్‌-2 పరీక్ష ఎప్పుడు ఉంటుందో తెలియక గ్రూప్స్‌కు ప్రిపేర్‌ కావాలా? పీజీ సెట్లకు ప్రిపేర్‌ కావాలా? అనే గందరగోళంలో ఉన్నారు. ప్రభుత్వం పోస్టులను పెంచుతామని.. పరీక్షలకు ప్రిపేర్‌ అయ్యే వారికి సమయం ఎక్కువగా ఇవ్వాలనే ఉద్దేశంతో గ్రూప్‌-2 పరీక్షను వాయిదా వేసినట్లు గతంలో ప్రభుత్వం ప్రకటించింది.

కానీ ఇప్పటి వరకు ప్రభుత్వం నుంచి ఏ శాఖల్లో పోస్టులను పెంచుతున్నారనేది స్పష్టత రాలేదు. కొన్ని శాఖల్లో ఉన్న ఖాళీల వివరాలను ప్రభుత్వానికి పంపితే వాటిని ఆర్ధిక శాఖ ఆమోదానికి పంపించినట్టు తెలుస్తోంది. ఆర్ధిక ఆమోదం తెలిపి ప్రభుత్వానికి పంపించినప్పటికీ ప్రభుత్వం ఆయా పోస్టుల భర్తీ కోసం స్పష్టమైన నిర్ణయం తీసుకోకపోవడంతో పోస్టుల పెంపుపై స్పష్టత రాలేదు. దీంతో తెలంగాణ పబ్లిక్‌ సర్వీస్‌ కమిషన్‌ గ్రూప్‌-2 పరీక్ష తేదీని ఇప్పటి వరకు ప్రకటించ లేదు. ప్రభుత్వం పోస్టుల సంఖ్యను తేల్చితే వెంటనే పబ్లిక్‌ సర్వీస్‌ కమిషన్‌ రీనోటిఫికేషన్‌ జారీ చేయాలని ఆలోచిస్తోంది. ఇప్పటికే వచ్చిన దరఖాస్తులతోపాటు కొత్తగా వచ్చే దరఖాస్తులను కలుపుకొని ఎంత మంది ఉంటారు, వారికి ఎన్ని పరీక్షా కేంద్రాలు అవసరం అవుతాయి అనే అంశాలను కమిషన్ పరిగణనలోకి తీసుకుని తగిన ఏర్పాట్లను చేసుకోనుంది.