కేంద్రాన్ని అస్థిరపర్చేందుకు ప్రతిపక్షాల కుట్రంటూ ప్రధాని సంచలన వ్యాఖ్యలు

Posted: 02/22/2016 10:34 AM IST

కేంద్రంలోని ఎన్డీయే ప్రభుత్వాన్ని అస్థిరపరిచేందుకు ప్రతిపక్షాలు పలు ఎన్జీవో సంస్థలు నిత్యం కుట్ర పన్నుతున్నాయంటూ ప్రధాని నరేంద్రమోడీ సంచలన వ్యాఖ్యలకు తెరలేపారు. , తన పరువు, ప్రతిష్ఠలను దిగజార్చేందుకు కొందరు అనుక్షణం ప్రయత్నిస్తున్నారని ఆయన అరోపించారు. ఒడిశాలోని బరగఢ్ లో జరిగిన బహిరంగ సభలో ప్రసంగించిన ఆయన విఫక్షాలను తూర్పరబడుతూ వ్యాఖ్యానించారు. అయితే తన ప్రభుత్వం వారి ఆటలు సాగనీయకుండా కఠినంగా వ్యవహరించడంతో చేసిది లేక అవి తనపై బురద జల్లుతున్నాయని కూడా ఆరోపించారు. కాగా, ఎట్టి పరిస్థితుల్లోను అభివృద్ధి పథాన్ని వీడబోనని, వీరి ఆరోపణలకు భయపడేది లేదని అన్నారు.

భారత్ లాంటి ఓ అతిపెద్ద ప్రజాస్వామ్య దేశానికి  ఓ చాయ్ వాలా ప్రధానమంత్రి అయ్యారన్న నిజాన్ని కొందరు జీర్ణించుకోలేకపోతున్నారని, ఈ మధ్యకాలంలో తనపై జరుగుతున్న కుట్ర, ఆరోపణల వర్షం కురిపించడం తదితరాలను ప్రజలంతా చూస్తున్నారని అన్నారు. దేశాన్ని దోచుకోవడానికి అవకాశం లభించడం లేదన్న బాధతోనే తనను లక్ష్యంగా చేసుకుంటున్నారని అన్నారు. వచ్చే ఆరేళ్లలో రైతుల ఆదాయం రెండింతలు చేస్తానని, స్టార్టప్ పరిశ్రమలు వ్యవసాయం అభివృద్ధికి ఉపయోగపడతాయని అన్నారు. కాగా, నేడు మోదీ తన సొంత నియోజకవర్గం వారణాసిలో జరిగే కార్యక్రమాల్లో పాల్గొంటారు.

మనోహర్