బీహారీలు మోదీలో లాలూను చూశారు

Posted: 11/11/2015 11:48 AM IST

బీహార్ ఎన్నికల్లో మోదీ అసలు ప్రధాని లాగా మాట్లాడలేదని.. ఎన్నికల ప్రచారంలో భాగంగా లాలూ ప్రసాద్ లాగా మాట్లాడారని అన్నారు. మోదీ గతంలో చెప్పిన సబ్ కా సాథ్ సబ్ కా వికాస్ ఎక్కడికి పోయిందని ఎంపీ భోలా సింగ్‌ మండిపడ్డారు. బీహార్ లో బిజెపి పార్టీ ఓటమికి కారణాల మీద పార్టీ సమిష్టి బాధ్యత వహిస్తున్నట్లు ప్రకటించింది. కానీ నిజానికి మోదీ చరిష్మా, అమిత్ షా చతురత బీహార్ లో పండలేదు. అయితే బీహార్ ఓటమి తర్వాత మోదీ వ్యతిరేక వర్గం విమర్శల దాడికి దిగుతోంది. బీహార్‌లో బిజెపి ఘోర పరాజయం నేపథ్యంలో అగ్రనాయకత్వంపై సొంత గూటి నుంచీ దాడి తీవ్రమైంది. మోడీ అసభ్యకరపదజాలమే బీహార్‌లో ఓటమికి కారణమైందని ఆ పార్టీ ఎంపి ఒకరు ప్రధానిపై మండిపడ్డారు. బీహార్‌ ఎన్నికల్లో బిజెపి ఓటమికి మోడీ సహా అగ్ర స్థాయి నాయకులదే బాధ్యత' అని ఎంపి భోలాసింగ్‌ విమర్శించారు. బీహార్‌లో బిజెపి ఓడలేదు. తనే ఆత్మహత్య చేసుకుంది అని ఆయన వ్యాఖ్యానించారు.

బీహార్ ఎన్నికల ప్రచారంలో చేసిన తప్పుల వల్లే పార్టీ ఘోరంగా విఫలమైందని చాలా మంది విమర్శిస్తున్నారు. అసెంబ్లీ ఎన్నికల ప్రచార కార్యక్రమంలో మోడీ విస్తృతంగా పాల్గొన్నప్పటికీ బిజెపి ఘోర పరాజయం పాలైన విషయం తెలిసిందే. మోడీ సహా బిజెపి అగ్ర నాయకుల హద్దుమీరిన అసభ్యకర పదజాలమే ఓటమికి ప్రధాన కారణమని మండిపడ్డారు. గోమాంసం అంశం, బిజెపి ఓడితే పాకిస్తాన్‌లో బాణసంచాకాలుతుందన్న అంశం, లాంటి అర్థం లేని అంశాలను ఎన్నికల్లో ప్రచారం చెయ్యడం వల్లే ఓటమి దరిచేరిందని అని భోలా సింగ్‌ వివరించారు.