ఇక స్వచ్ఛ హైదరాబాద్

Posted: 05/16/2015 07:53 AM IST

తెలంగాణ ప్రభుత్వం నేటి నుండి స్వచ్ఛ హైదరాబాద్‌ కార్యక్రమానికి ప్రభుత్వం శ్రీకారం చుట్టనుంది. ఈ మధ్యాహ్నం 3 గంటలకు హెచ్‌ఐసీసీలో ఈ కార్యక్రమం ప్రారంభం కానుంది. కేంద్ర ప్రభుత్వం ప్రతిష్టాత్మకంగా చేపట్టిన స్వచ్ఛ్‌ భారత్‌ కార్యక్రమాన్ని స్ఫూర్తిగా తీసుకున్న తెలంగాణ ప్రభుత్వం ఈ కార్యక్రమాన్ని చేపట్టింది. కార్యక్రమంలో భాగంగా జీహెచ్‌ఎంసీ పరిధిలోని పలు ప్రాంతాల్లో ప్రజాప్రతినిధులు, అధికారులు పర్యటించనున్నారు. శ్మశానవాటికలు, తాగునీటి వసతి, పారిశుధ్యం తదితర సమస్యల గురించి ప్రజలను అడిగి తెలుసుకోనున్నారు. సమస్యల పరిష్కారంపై దృష్టిసారించి అవసరమైన చర్యలు తీసుకోనున్నారు. విశ్వనగరమైన హైదరాబాద్‌ నగరాన్ని పరిశుభ్రంగా ఉంచాలనే ఉద్దేశంతో ముఖ్యమంత్రి కేసీఆర్‌ గత కొద్ది రోజులుగా స్వచ్ఛ హైదరాబాద్‌ కార్యక్రమ నిర్వహణపై కసరత్తు చేస్తూ వచ్చారు. ఇందులో భాగంగా ఇటీవలే నగరాన్ని 425 విభాగాలుగా విభజించారు. ఒక్కో విభాగానికి ఒక్కో ఇన్‌చార్జీని నియమిం చారు. ఇన్‌చార్జీ నేతృత్వంలో విభాగంలో ఉన్న ఇతర సభ్యులు తమకు కేటాయించిన ప్రాంతాల్లో పర్యటిస్తారు.  

విశ్వనగరంగా తీర్చిదిద్దే క్రమంలో స్వచ్ఛ హైదరాబాద్ పాత్రను ముఖ్యమంత్రి వివరించే అవకాశం ఉంది. గవర్నర్, సీఎంలతోపాటు మంత్రులు, ఎమ్మెల్యేలు, నగరంలోని 425 యూనిట్ల మెంటర్లు/ప్యాట్రన్లు, ఉన్నతాధికారులు, ప్రముఖులు ఈ కార్యక్రమంలో పాల్గొంటున్నారు. సాయంత్రం 4.35 లకు ఈ కార్యక్రమం ముగిసిన తర్వాత ఆయా విభాగాలకు మెంటర్లు/ప్యాట్రన్లుగా నియమితులైన వారు వారి విభాగాలకు వెళ్లి అక్కడి పరిస్థితిని అంచనా వేస్తారు. స్థానిక కాలనీవాసులు, స్వచ్ఛ యూనిట్ సభ్యులతో సమావేశమై స్వచ్ఛ హైదరాబాద్ అంశాలపై పూర్తిస్థాయిలో వివరిస్తారు. ఈ నెల 17 నుంచి పూర్తిస్థాయి స్వచ్ఛ హైదరాబాద్ కార్యక్రమాలను చేపడతారు. ఈ సందర్భంగా స్థానిక పరిసరాలను శుభ్రపర్చనున్నారు. ఐదు రోజులపాటు కొనసాగ నున్న ఈ కార్యక్రమం నగర రూపురేఖలను మార్చనున్నాయి.

*అభినవచారి*