పిల్లలు కావాలని నాలుక కోసుకున్నాడు ..!

Posted: 03/27/2015 09:14 AM IST

A pure devote cut his toung his self at mediyamman temple

కోరికలు తీరాలని మనలో చాలా మంది చాలా రకాలుగా మొక్కులు మొక్కుకుంటాం. కోరికలు ఫలించాలని కొబ్బరికాయలు కొట్టడం మామూలే. కొంత మంది మరో అడుగు ముందుకు వేసి కొంత భిన్నంగా ఏదో ఒకటి చేస్తారు. అయితే మూఢనమ్మకాలు మరీ ఎక్కువైతే మాత్రం విపరీతాలు తావిచ్చినట్లవుతుంది. తాజాగా ఓ భక్తశిఖామణి పిల్లలు కలగాలని ఏకంగా తన నాలుకనే అమ్మవారికి సమర్పించాడు. అయినా నాలుక కోసుకుంటేనే పిల్లలు కలుగుతారని అతనికీ తెలుసు. మరి తెలిసినా అమ్మవారి భక్తిలో మునిగో.. లేక పిల్లలు కావాలని కోరిక బలంగా ఉండో నాలుకనే కోసుకున్నాడు. అప్పుడెప్పుడో భక్త కన్నప్ప శివుడికి తన కళ్లు ఇచ్చినట్లు ఓ తమిళ భక్తుడు ఏకంగా తన నాలుకను అమ్మవారికి సమర్పించాడు.

నాలుక కోసి అమ్మవారికి సమర్పిస్తే సంతానం కలుగుతుందంటూ పూజారి చెప్పిన మాట నమ్మిన ఓ యువకుడు ఆ మేరకు తెగించి, తన మూఢ భక్తిని చాటుకున్నాడు. తమిళనాడు వేలూరు జిల్లా జోలార్‌పేట సమీపంలోని పొన్నేరిలో వేడియమ్మన్‌ ఆలయం వుంది. ఈ ఆలయానికి మిట్టకుప్పం గ్రామానికి చెందిన సుధాకర్‌వచ్చాడు. గుడిచుట్టూ 8 సార్లు ప్రదక్షిణ చేసిన సుధాకర్‌ తన జేబులోఉన్న చిన్న చాకును తీసి నాలుకను కోసేసుకున్నాడు. తర్వాత ఆ నాలుక ముక్కను అమ్మవారి విగ్రహం ముందుంచి అక్కడే కుప్పకూలిపోయాడు. ఏం జరిగిందో అర్థం గాని భక్తులు అతని ముఖంపై నీళ్లు చల్లి పైకి లేపారు. విషయమేంటని అడిగితే ఓ చీటిని తీసి వారికి చూపించాడు. తనకు వివాహమై మూడేళ్లయినా ఇంత వరకూ సంతాన భాగ్యం కలుగలేదని, అయితే ఆ ఆలయ పూజారి మునియాండి నాలుక కోసి అమ్మవారికి సమర్పిస్తే తక్షణం సంతానం కలుగుతుందని చెప్పడంతో తాను ఆ మేరకు మొక్కు తీర్చుకున్నానని ఆ చీటిలో వుంది. అది చదివిని భక్తులు సుధాకర్‌ను వెంటనే వేలూరు ప్రభుత్వాసుపత్రికి తరలించారు. అయితే ఆ నాలుకను మాత్రం అమ్మవారి విగ్రహం ముందు అలాగే వదిలేయడంతో చూసేందుకు భక్తులు ఎగబడ్డారు. మొత్తానికి మన వద్ద ఇంకా ఇలాంటి మూఢనమ్మకాలను నమ్మేవారు ఇంకా ఉన్నారని తెలుస్తోంది. మరి అమ్మవారు ఆ అపర భక్తుడిని కరుణిస్తుందో లేదో పాపం.

- అభినవచారి