సరికొత్త మలుపు తిరిగిన మైత్రేయి-కార్తీక్ రేప్ కేసు!

Posted: 09/03/2014 10:40 AM IST

(Image source from: kannada director rishi files complaint on actress mythriya that they are already married before)

కన్నడ వర్థమాన నటి మైత్రేయి.. తనను పెళ్లి చేసుకుంటానని మోసం చేశాడంటూ ప్రస్తుత కేంద్రరైల్వేమంత్రి సదానందగౌడ కుమారుడు కార్తీక్ గౌడపై కేసు వేసిన సంగతి తెలిసిందే! దీంతో పోలీసులు అతనిమీద 420 చీటింగ్ కేసు నమోదు చేశారు. అతనిని వెంటనే లొంగిపోవాల్సిందిగా పోలీసులు అల్టిమేటం జారీచేసిన రోజునుంచి కార్తీక్ అడ్రస్ లేకుండా పరార్ అయ్యాడు. దీంతో ఇతనిమీద అనుమానాలు మరింత పెరిగిపోయాయి. కార్తీక్ నిజంగానే మైత్రేయిని మోసం చేసి పారిపోయాడంటూ పోలీసులు అభిప్రాయాన్ని వ్యక్తం చేశారు. ఈ నేపథ్యంలోనే అతనికోసం గాలింపు చర్యలు వేగవంతం చేశారు. అయితే ఇంతలోనే పోలీసులకు కోలుకోలేని గట్టి షాక్ తగిలింది. సినిమాలో కంటే ఎక్కువగా ఈ ఉదంతంలో ట్విస్టుల మీద ట్విస్టులు చోటు చేసుకుంటున్నాయి. ఒకేసారి ఇన్ని ట్విస్టులు ఎదురుకావడంతో పోలీసులు సైతం గందరగోళ పరిస్థితిలో పడిపోయారు.

కార్తీక్ గౌడ సంగతి అటుంచితే.. మైత్రేయిని ఇంతకుముందే 2004వ సంవత్సరంలో తాను పెళ్లి చేసుకున్నానంటూ ఒక కన్నడ డైరెక్టర్ రిషి పోలీసులను ఆశ్రయించి సరికొత్త వివాదానికి తెరతీశాడు. 2004లో ‘‘సూర్య ది గ్రేట్’’ మూవీని చిత్రీకరిస్తున్న సమయంలో జూలై 17వ తేదీన శేషాద్రిపురంలోని సన్మాన్ లాడ్జిలో మైత్రేయి, తాను పెళ్లి చేసుకున్నామని రిషి చెబుతున్నాడు. అంతేకాదు.. వారిద్దరూ కలిసి దాదాపు నాలుగు నెలలు కాపురం కూడా చేశారని.. అనంతరం మైత్రేయి తన దగ్గరున్న 2 లక్షలు తీసుకుని ఉడాయించిందని షాకింగ్ స్టేట్ మెంట్లు పేర్కొన్నాడు. ఆరోజు నుంచి మైత్రేయి తనకు కనబడలేదని.. అయితే కార్తీక్ పై ఆరోపణలు చేస్తూ మీడియాకెక్కడం ద్వారా ఆమె మళ్లీ నాకంట పడిందని రిషి వాపోతున్నాడు. అందువల్లే తాను ఇన్నాళ్ల తర్వాత మైత్రేయి మీద పోలీసులకు ఫిర్యాదు చేసినట్లు తెలిపాడు. అంతేకాదు.. మైత్రేయి తనతో కలిసున్న సందర్భంలోనూ తనకు తెలియకుండా దొంగచాటుగా తన బాయ్ ఫ్రెండ్స్ తో మైత్రేయి తిరిగేదని.. తనలాగే చాలామంది అబ్బాయిలు ఆ యాక్ట్రెస్ చేతిలో మోసపోయారని పోలీసుల ఫిర్యాదులో పేర్కొన్నాడు. అలాగే చాలామంది నిర్మాతల నుంచి ఆమె పెద్ద మొత్తంలో డబ్బులు గుంజినట్లు కూడా అతను ఆరోపణలు చేస్తున్నాడు.

ఒకవైపు కేంద్రమంత్రి కొడుకు మీద కేసు నమోదు చేసి, విచారణ చేపట్టడంలో తర్జనభర్జన పడుతున్న పోలీసులకు.. అనుకోకుండా కన్నడ డైరెక్టర్ రిషి నటి మైత్రేయి మీద ఇటువంటి ఆరోపణలు చేయడంతో వారు పెద్ద షాక్ కే గురయ్యారు. రిషి రాకతో ఇప్పుడు మైత్రేయి కేసు మరో కొత్త మలుపు తిరిగింది. కేంద్రమంత్రి కొడుకుపైనే కేసు వేసిన నటి మైత్రేయి మీద రివర్స్ గా ఓ డైరెక్టర్ ఆమెపై ఆరోపణలు చేయడాన్ని చూస్తుంటే పలు అనుమానాలను వ్యక్తం అవుతున్నాయి. కార్తీక్ కే ఇదంతా వెనకుండి నడిపిస్తున్నాడంటూ విశ్లేషకులు అభిప్రాయపడుతున్నారు. ఇదిలావుండగా.. మైత్రేయి మాత్రం కార్తీకే తన భర్తంటూ వాపోతోంది. తన ఫ్రెండ్స్ కి ఈ విషయం తెలిసినప్పటికీ వారు చెప్పడానికి భయపడుతున్నారని చెబుతోంది. కార్తీక్ కారు డ్రైవర్ కి తమ ప్రేమ వివాహం గురించి తెలుసునని.. అతనే ఈ ఆపద నుంచి తనను కాపాడుతాడని ఆమె పేర్కొంటోంది. ఏదిఏమైనా.. డైరెక్టర్ రిషి ఎంట్రీ ఇది సంచలనంగా మారింది. ఇక్కడ ఎవర్నెవరు మోసం చేశారో.. ఎవరు మోసపోయారో..? ఎవరు నిర్దోషులో..? అనే విషయాల్లో మాత్రం అస్సలు క్లారిటీ రావడం లేదు. మరి ఈ చిక్కుముడిని పోలీసులు ఎలా విప్పుతారో వేచి చూడాల్సిందే!