తెలంగాణకు మరో దెబ్బ.. ప్రత్యేక కోట లేదట!

Posted: 08/18/2014 01:03 PM IST

Ap devadaya sakha minister manikyala rao sensational statements on telangana

రాష్ట్ర విభజన అనంతరం తెలంగాణాకు సంబంధించి కొన్ని విషయాల్లో దెబ్బమీద దెబ్బ పడుతూనే వుంది. రైల్వే, కేంద్ర బడ్జెట్ లలో ప్రత్యేక హోదా ఏమీ ఇవ్వలేదంటూ ఆనాడు కేసీఆర్ మొరపెట్టుకున్న సంగతి తెలిసిందే! అలాగే రైతుల రుణమాఫీల విషయంలోనూ ఆర్బీఐ ఎటువంటి సహాయం చేయదని స్పష్టం చేసింది. పైగా విద్యుత్తు కష్టాలతో చీకటి ముసుగులో మునిగిపోయింది. ఇలా అనేక విధాలుగా కష్టాలను ఎదుర్కుంటున్న తెలంగాణాకు ఇప్పుడు మరో షాక్ తగిలినట్టు తెలుస్తోంది. ఇదేమీ అంత పెద్ద విషయం కాకపోయినా.. తెలంగాణవారికి మాత్రం కాస్త ఇబ్బంది కలిగిస్తుంది.

ఏపీ దేవదాయశాఖ మంత్రి అయిన మాణిక్యాలరావు.. దేవాలయాల్లో పాలకమండళ్లను రెండువారాల్లో నియమిస్తామని ప్రకటించిన నేపథ్యంలో తెలంగాణ విషయంలో కుండబద్ధలు కొట్టారు. ఈ అంశంపై సోమవారంనాడు హైదరాబాదులో ఆయన మాట్లాడుతూ.. టీటీడీకి స్పెసిఫైడ్ అథార్టీ కమిటీని నియమించే యోచన లేదని స్పష్టం చేశారు. సెప్టెంబర్ 2వ వారంలో టీటీడీ పాలకవర్గం నియామకంతోపాటు వచ్చే నెలాఖరుకల్లా అన్ని దేవాలయాల పాలకవర్గాలను నియమిస్తామని ఆయన అన్నారు. టీటీడీలో సభ్యుల సంఖ్య 15 నుంచి 18 వరకు పెంచుతామని ఆయన వెల్లడించారు.

అలాగే ప్రతి దేవాలయ కమిటీలో ఇద్దరు సభ్యులు, ఒక ఎక్స్ అఫిషియో మెంబర్ పెంపు కూడా ఖచ్చితంగా వుంటుందని ఆయన పేర్కొన్నారు. ఇంతవరకు బాగానే వుంది కానీ... టీటీడీ పాలకవర్గంలో తెలంగాణకు ప్రత్యేక కోటా ఏమీలేదని ఆయన తేల్చి చెప్పారు. నిన్నమొన్నటివరకు కేవలం ప్రాంతాలవారీగా గొడవ పడ్డ ఆంధ్ర, తెలంగాణ మంత్రులు.. ఇప్పుడు దేవుడికి సంబంధించి విషయాల్లోనూ గొడవలు పడాల్సి వస్తున్న పరిస్థితి వచ్చేసింది. మరి దీనిపై తెలంగాణ మంత్రులు ఎలా స్పందించనున్నారో..? ఇది ఎంత పెద్ద దుమారాన్ని రేపుతుందో వేచి చూడాల్సిందే!