పంజాబ్ పై ప్రతీకారం తీర్చుకున్న కోల్ కత్తా

Posted: 04/27/2013 11:05 AM IST

గత సీజన్ లో ఐపీఎల్ ఛాంపియన్ గా నిలిచిన కోల్ కత్తా ఈ సీజన్ లో లీగ్ దశలోనే తడబాటుకు గురైంది. ఆడిన తొమ్మిది మ్యాచ్ ల్లో కేవలం మూడంటే మూడే గెలిచింది. నిన్న రాత్రి తాడో పేడో తేల్చుకోవాల్సిన మ్యాచ్ లో విజయం సాధించి వరుస పరాజయాల నుండి బయటపడింది. అంతకు ముందు అదే పంజాబ్ జట్టు పై పరాజయం పాలైన నైట్ రైడర్స్ దానికి ప్రతీకారంగా నిన్న రాత్రి జరిగిన మ్యాచ్ లో పంజాబ్ ని 6 వికెట్ల తేడాతో ఓడింది. మొదట బ్యాటింగ్ చేసిన పంజాబ్ నిర్ణీత 20 ఓవర్లలో ఆరు వికెట్లు నష్టపోయి 149 పరుగులు చేసింది. పంజాబ్ బ్యాట్స్ మెన్స్ మనన్ వోహ్రా (21 బంతుల్లో 3 ఫోర్లు, సిక్సర్‌తో 31), గుర్‌కీరత్ (15 బంతుల్లో 2 ఫోర్లు, 2 సిక్సర్లతో 28 నాటౌట్ ), గిల్‌క్రిస్ట్ (27 బంతుల్లో 4 ఫోర్లతో 27), మన్‌దీప్ (20 బంతుల్లో 5 ఫోర్లతో 25), డేవిడ్ హస్సీ (20 బంతుల్లో ఫోర్‌తో 21) రాణించారు. టాప్ ఆర్డర్ బ్యాట్స్ మెన్స్ సమిష్టిగా రాణించినా, కొల్ కత్తా బౌలర్లు కట్టడిగా బౌలింగ్ చేయడంతో భారీ స్కోరు చేసే అవకాశం ఉన్నా సాధించలేకపోయింది.

ఇక 150 పరుగుల విజయ లక్ష్యంతో బ్యాటింగ్ కి కోల్ కత్తా కు ఆదిలో కీలక వికెట్లు కోల్పోయి కష్టాల్లో పడ్డా మిగతా బ్యాట్స్ మెన్స్ సమిష్టిగా రాణించి జట్టుకు విజయాన్ని అందించారు. కలిస్ (33 బంతుల్లో 6 ఫోర్లతో 37; 2/14) ఆల్‌రౌండ్ షోతో రాణించగా, మన్వీందర్ బిస్లా (44 బంతుల్లో 3 ఫోర్లు, 3 సిక్సర్లతో 51 నాటౌట్), ఇయాన్ మోర్గాన్ (26 బంతుల్లో 3 ఫోర్లు, 4 సిక్సర్లతో 42) చెలరేగారు. దీంతో మరో పది బంతులు మిగిలి ఉండగానే కోల్ కత్తా విజయాన్ని అందుకుంది. కలీస్ బ్యాటింగ్ లోనూ, బౌలింగ్ లోను రాణించాడు. దీంతో కోల్ కత్తా ఆశలు కాస్త సజీవం అయ్యాయి.