మేకప్ బ్రష్’లను శుభ్రం చేయకపోతే.. ఎంతో ప్రమాదం!

Posted: 01/13/2015 03:49 PM IST

సాధారణంగా మహిళలకు ప్రతిరోజూ మేకప్ వేసుకోవడం అలవాటు. ఇక యుక్తవయస్సులో వున్న అమ్మాయిలైతే గంటల తరబడమరీ అద్దం ముందు కూర్చుని తమ దగ్గరున్న మేకప్ బాక్స్’తో తమనుతాము అందంగా సింగారించుకుంటారు. ప్రస్తుత కాలంలో అందరి ఇళ్లల్లోనూ మేకప్ బాక్సులు ఖచ్చితంగా వుంటాయి. అయితే.. వీటిని ఉపయోగించేటప్పుడు చాలా జాగ్రత్తలు పాటించాల్సి వుంటుంది. ముఖ్యంగా ఇందులో వుండే బ్రష్’ల విషయంలో ఎంతో అప్రమత్తంగా వుండాలి. లేకపోతే.. అందం విషయంలో తీవ్ర పరిణామాలను చవిచూడాల్సి వస్తుంది.

చాలావరకు బ్రషెస్’తోనే మేకప్ చేసుకుంటారు. అలా ప్రతిరోజు వాడే బ్రష్’లను నిత్యం శుభ్రం చేసుకుంటూ వుండాలి. లేదా.. కొత్తవి ఉపయోగించాలి. అంతేగానీ.. వాడిన బ్రష్’లనే శుభ్రం చేయకుండా రోజూ వాడితే.. అది స్కిన్ అలెర్జీలకు దారితీస్తుంది. తద్వారా ముఖం అందవిహీనంగా మారిపోతుంది. చర్మం పొడిగా మారడం, మొటిమలు రావడం, అక్కడక్కడ నల్లని ఛాయలు రావడం, గీతలు పడినట్లుగా కనిపించడం లాంటి ఎన్నో సమస్యలను ఎదుర్కోవలసి వస్తుంది. కాబట్టి.. వారానికి ఒకసారి మేకప్ బ్రష్’లను శుభ్రం చేస్తుండాలి. లేకపోతే అందులో బ్యాక్టీరియా చేరిపోయి చర్మానికి హాని కలిగిస్తాయి.