ప్రస్తుతకాలంలో వాహనాల వాడకం విపరీతంగా పెరిగిపోయింది. యుక్తవయస్కుల నుంచి 60 ఏళ్లు పైబడినవారు కూడా ప్రతిఒక్కరు కారును నడుపుతున్నారు. అదేవిధంగా యాక్సిడెంట్లు కూడా ఎక్కడబడితే అక్కడ జరుగుతున్నాయి. అయితే తాజాగా నిర్వహించిన సర్వేల్లో.. యాక్సిడెంట్లలో ఎక్కువగా ప్రాణాలను కోల్పోతున్నది మలివయస్సులవారే (60 ఏళ్లు పైబడినవారు). ఎందుకంటే.. వయసు మీదపడేకొద్దీ శరీరంలో వుండే పోషక పదార్థాలు తగ్గిపోతుంటాయి. ఫలితంగా చూపు మందగించడం, సరిగ్గా వినిపించకపోవడం వంటి సమస్యలు తలెత్తుతాయి.

సాధారణంగా మలివయస్సులో వున్నవారు డ్రైవింగ్ చేయడంలో అనేక సమస్యలను ఎదుర్కొంటున్నారు. అటువంటి సమయాల్లో మీ శరీరం మీకు కొన్ని సూచనలను తెలియజేస్తుంది. అంటే.. డ్రైవింగ్ చేయడానికి ఇబ్బందికరంగా అనిపిస్తే.. అప్పటి నుంచి డ్రైవింగ్ చేయడం మానేస్తే చాలా మంచిది. అటువంటి ఇబ్బందులను ముందుగానే పసిగట్టడానికి కొన్ని పద్ధతులు కూడా వున్నాయి. అవేమిటో ఒకసారి పరిశీలిద్దాం...

1. కంటిచూపు సమస్య : మలివయస్సులో వున్నవారు డ్రైవింగ్ చేస్తున్న సమయంలో చాలావరకు కళ్లు మసకమసకగా కనిపిస్తాయి. ఎదుటివాహనం చాలా దగ్గరగా వచ్చేంతవరకు సరిగ్గా కనిపించదు. అలాగే కళ్లు కొంచెం నొప్పిగా కూడా అనిపిస్తాయి. అటువంటి సమయాల్లో డ్రైవింగ్ చేయకుండా కంటి చెకప్ చేయించుకుంటే మంచిది. లేకపోతే చాలా ప్రమాదాలను ఎదుర్కోవలసి వస్తుంది.

2. వినికిడి సమస్య : మలివయస్సులో వున్న ప్రతిఒక్కరికి వినికిడి సమస్య వుంటుంది. కొంతమందిలో ఇది ఒక మోతాదులో వుండే.. మరికొంతమంది ఎంతో గట్టిగా అరిస్తే మాత్రం మాటలు వినిపించవు. అటువంటి సమస్యలే మీకు వున్నాయని అనిపిస్తే.. వెంటనే డ్రైవింగ్ చేయడం మానేయాలి. లేకపోతే వెనుక నుంచి వచ్చే వాహన హారన్ శబ్దం వినబడక.. ప్రమాదాలకు దారితీస్తుంది. కాబట్టి సాధ్యమైంత త్వరగా డాక్టర్ తో చెకప్ చేయించుకుంటే మంచిది.

3. రిఫ్లెక్స్ సమస్య (అసంకల్పిత చర్య) : మలివయస్సులో వున్నవారు ఎక్కువగా ఈ సమస్యనే ఎదుర్కొంటున్నారు. వయసు మీదపడేకొద్దీ శరీరంలో వుండే పోషకాలు పూర్తిగా తగ్గిపోతాయి. దాంతో శరీరంలో వుండే అవయవాలు ఒకదానితో ఒకటి సమన్వయంగా సహకరించవు. దీంతో శరీర అవయవాలు ఫ్లెక్సిబుల్ గా లేకపోవడం వల్ల యాక్సిడెంట్లు జరిగే ప్రమాదం చాలా వుంది.

ఇటువంటి సమస్యలను అధిగమించే చిట్కాలు :

1. కంటి సమస్య అధికం అయినప్పుడు ముందుగా డాక్టర్ దగ్గర పరిశీలించుకోవడం ముఖ్యం. దానికి సంబంధించిన కళ్లజోడును నిత్యం వాడితే ఎలాంటి ప్రమాదం వుండదు. పైగా ఏడాదికొకసారి డాక్టర్ దగ్గరకు వెళ్లి కంటి చెకప్ చేయించుకోవాలి. దీంతో మీ దృష్టిలోపం కొంతవరకు తగ్గి, డ్రైవింగ్ చేయడానికి అనుకూలంగా వుంటుంది. అలాగే వినికిడి సమస్య అధికంగా వున్పప్పుడు డాక్టర్లు ఇచ్చిన సలహాల మేరకు హియరింగ్ ఎయిడ్స్ ను వాడాలి. 

2. ముఖ్యంగా మలివయస్సులో వున్నవారికి నిద్ర చాలా అవసరం. సమయానుకూలంగా సరిగ్గా నిద్రపోకపోతే ఆరోగ్యానికి సంబంధించిన ప్రమాదాలను ఎదుర్కోవలసి వస్తుంది. కాబట్టి వెంటనే డాక్టర్ల సలహాల మేరకు ఆరోగ్యపద్ధతులను పాటించాలి.

3. మీరు కారు నడుపుతున్నప్పుడు చాలా జాగ్రత్తగా వ్యవహరించాలి. ఎక్కువ వేగంగా కాకుండా నెమ్మదిగా, ఒక పక్కకు వెళ్లాలి. అలాగే కారులో వుండే కిటికీలను దుమ్ము లేకుండా చూసుకోవాలి. ఇటువంటి పద్ధతులను అనుసరిస్తే.. డ్రైవింగ్ చేయడానికి కాస్త అనుకూలంగా వుంటుంది.