వైవిధ్య పాత్రలతో మెప్పిస్తున్న యువహీరో

Posted: 06/06/2015 02:57 PM IST

‘కర్మ’లాంటి వైవిధ్యభరితమైన కథాచిత్రంతో చిత్రపరిశ్రమలోకి ఎంట్రీ ఇచ్చిన నటుడు అడవిశేష్! ఇక అప్పటినుంచి తన సినీప్రస్థానాన్ని కొనసాగించిన ఈ హీరో.. ఇప్పటివరకు వైవిధ్యమైన పాత్రల్లో నటిస్తూ ప్రేక్షకులను అలరిస్తున్నాడు. ఒక విలన్ గా, సపోర్టివ్ యాక్టర్ గా, పోలీస్ ఆఫీసర్ గా, హీరోగా తనను తాను మలుచుకుంటూ తనకంటూ ప్రత్యేక గుర్తింపు గడించాడు ఈ హీరో! అవకాశం వస్తే చాలు ఏదైనా సినిమాలో నటిద్దామని అనుకుంటున్న ఈ రోజుల్లో.. అందుకు భిన్నంగా ఆలోచించి ప్రత్యేక పాత్రల్లో నటించాడు శేష్!

ప్రస్తుతం పోటీ ఎక్కువగా వున్న ఇండస్ట్రీలో ప్రత్యేక గుర్తింపు సాధించాలంటే అందుకు వైవిధ్యమే బెస్ట్ అనుకుంటూ ముందుకు నడిచాడు. అదే అతనిని తారాస్థాయికి తీసుకెళ్లింది. అందుకు ఉదాహరణగా ఈయన నటించిన ‘పంజా’, ‘బలుపు’, ‘రన్‌ రాజా రన్’ లాంటి సినిమాలనే తీసుకోవచ్చు. ‘పంజా, బలుపు’ సినిమాల్లో విలన్ గానూ.. ‘రన్ రాజా రన్’ సినిమాలో ఓ పోలీస్ పాత్రలోనూ పూర్తిగా ఒదిగిపోయి ప్రేక్షకులను మెప్పించాడు. ఇక తాజాగా ‘దొంగాట’ చిత్రంతో హీరోగా భారీ విజయాన్ని తన ఖాతాలో వేసుకున్నాడు.

ఇంకో విశేషం ఏమిటంటే.. ‘అసుర’ సినిమాకి తన వాయిస్ ఓవర్ అందించిన ఈ యువహీరో.. ‘బాహుబలి’ లాంటి ప్రతిష్టాత్మక చిత్రంలో ఓ ప్రత్యేకమైన పాత్రలో కనువిందు చేయనున్నాడు. ఈ అవకాశాన్ని కల్పించిన దర్శకధీరుడు రాజమౌళికి కృతజ్ఞతలు తెలిపిన శేష్... ఆ పాత్ర తన కెరీర్ లో మైలురాయని, దాంతో తన ఇమేజ్ మరింత పాపులర్ అవుతుందని అభిప్రాయం వ్యక్తం చేశాడు. ఆ పాత్ర ప్రేక్షకులకు ఎంతగానో మెప్పిస్తుందన్న నమ్మకాన్ని వ్యక్తపరిచాడు.

ఇలా ఈ విధంగా అరుదైన పాత్రల్లో నటిస్తూ ముందుకు దూసుకెళ్తున్న ఈ హీరో.. త్వరలోనే మరో రెండు సినిమాల్లో నటించనున్నట్లు వార్తలొస్తున్నాయి. నిజానికి మొదట్లో ఈ హీరోకి మైనస్ మార్కులు పడ్డా.. ఇండస్ట్రీలో నిర్వహించిన పరీక్షల్లో నెగ్గుకుంటూ ఇప్పుడు సక్సెస్ ఫుల్ నటుడిగా ప్రూఫ్ చేసుకున్నాడు.