గోపీచంద్

Posted: 02/26/2015 03:51 PM IST

‘లౌక్యం’ సినిమాతో భారీ హిట్ అందుకున్న గోపీచంద్.. ప్రస్తుతం ‘జిల్’ మూవీ చిత్రీకరణలో బిజీగా వున్నాడు. నూతన సంవత్సరం సందర్భంగా ఈ మూవీకి సంబంధించి ఫస్ట్ లుక్ పోస్టర్లు విడుదలయ్యాయి. ఆ పోస్టర్లకు ప్రేక్షకుల నుంచి అనూహ్య స్పందన లభించింది. రాధాకృష్ణ కుమార్ దర్శకత్వంలో తెరకెక్కుతున్న ఈ మూవీని యు.వి.క్రియేషన్స్ సంస్థ భారీ బడ్జెట్టుతో నిర్మిస్తోంది.

‘రన్ రాజా రన్’ చిత్రానికి అద్భుతమైన పాటలు అందించిన మ్యూజిక్ డైరెక్టర్ ఘిబ్రన్.. ఈ చిత్రానికి పాటలు సమకూరుస్తున్నాడు. ఇక గోపీచంద్ సరసన హీరోయిన్ గా ‘ఊహలు గుసగుసలాడే’ ఫేం రాశిఖన్నా నటిస్తోంది. ప్రస్తుతం శరవేగంగా షూటింగ్ జరుపుకుంటున్న ఈ చిత్రాన్ని మార్చి నెలాఖరులో విడుదల చేసేందుకు దర్శకనిర్మాతలు సన్నాహాలు చేస్తున్నారు. త్వరలోనే ఆడియో విడుదల తేదీని అధికారికంగా వెల్లడించనున్నారు.

ఈ సినిమాలో గోపీచంద్ సరికొత్త లుక్ లో ప్రేక్షకులను అలరించనున్నాడని యూనిట్ వర్గాలు తెలుపుతున్నాయి. అలాగే సరికొత్త ఎలిమెంట్లతో తెరకెక్కుతున్న ఈ చిత్రం మంచి విజయం సాధిస్తుందని, గోపీచంద్ క్రేజ్ ని మరింతగా పెంచుతుందని అభిప్రాయపడుతున్నారు.