రామానాయుడు స్టూడియోలో భారీ షెడ్యూల్

Posted: 04/18/2014 01:04 PM IST

మెగా పవర్ స్టార్ రామ్ చరణ్, కాజల్ జంటగా, క్రియేటివ్ దర్శకుడు కృష్ణ వంశీ దర్శకత్వంలో, శివబాబు బండ్ల సమర్పణలో, పరమేశ్వర ఆర్ట్స్ ప్రొడక్షన్స్ పతాకంపై అత్యంత భారీ తారాగణంతో తెరకెక్కుతున్న ‘గోవిందుడు అందరి వాడేలే ’ సినిమా తాజా షెడ్యూల్ ఈనెల 21 తేదీన నుండి రామానాయుడు సినీ విలేజ్ లో ప్రారంభం కాబోతుంది.

ఈ ఈ షెడ్యూల్ దాదాపు 40 రోజుల పాటు ఉంటుందని నిర్మాత బండ్ల గణేశ్ చెప్పారు. భారీ హంగులతో, గ్రామీణ వాతావరణాన్ని తలపించే హౌస్ సెట్‌లో ప్రధాన తారాగణం అంతా షూటింగుల్లో పాల్గొంటారని చెప్పుకొచ్చాడు. ఇప్పటికే రెండు భారీ షెడ్యూల్స్ ను కన్యాకుమారి, పొలాచ్చిల్లో పూర్తి చేసుకొని ఇటీవలే హైదరాబాద్ కి వచ్చారు. ఈ సినిమాలో చరణ్ పక్కన కాజల్ అగర్వాల్ కథానాయికగా నటిస్తోంది.

యువన్ శంకర్ రాజా సంగీతాన్ని సమకూర్చే ఈ సినిమాలో శ్రీకాంత్, కమలినీ ముఖర్జీ మరో జంటగా నటిస్తారు. ఈ చిత్రానికి ‘గోవిందుడు అందరి వాడేలే' అనే టైటిల్ ఖరారు చేయడంతో అభిమానులతో పాటు ఫ్యామిలీ ఆడియన్స్‌లో భారీగా అంచనాలు పెరిగాయి.