ప్రపంచ ర్యాకింగ్స్ లో దిగజారిన సైనా

Posted: 06/05/2015 02:00 PM IST

భారత స్టార్ షట్లర్ సైనా నెహ్వాల్ ప్రపంచ బ్యాడ్మింటన్ ఫెడరేషన్ విడుదల చేసే ర్యాకింగ్ లో దిగజారింది. ప్రపంచ నంబర్ 1 ర్యాంకును కోల్పోయి.. రెండు స్థానాలను దిగజారింది. గత కొన్ని రోజులుగా ప్రపంచ నంబర్ 1 ర్యాంకులో కొనసాగుతోన్న హైదరాబాదీ షట్లర్ తాజాగా ప్రకటించిన ర్యాంకుల్లో రెండు స్థానాలు కోల్పోయి మూడో ర్యాంకుకు పడిపోయింది. బ్యాట్మిండన్ ఒలంపిక్ ఛాంపియన్ లీ జురుయ్ 85,217 పాయింట్లతో  అగ్రస్థానంలో ఉండగా, కరోలినా మారిన్ 80,752 పాయింట్లతో రెండో స్థానంలో ఉంది. గతంలో కూడా సైనా తొలి ర్యాంకును కైవసం చేసుకోగా కేవలం  వారం రోజులు మాత్రమే అగ్రస్థానాన్ని నిలబెట్టుకోగలిగింది. సైనా ఖాతాలో ప్రస్తుతం 79,192 పాయింట్లున్నాయి. బ్యాడ్మింటన్ ర్యాంకుల్లో ప్రపంచ తొలి ర్యాంకును కైవసం చేసుకున్న ఘనత సైనా నెహ్వాల్ సొంతం.

పురుషుల సింగిల్స్ లో కిడాంబి శ్రీకాంత్ మూడో ర్యాంకును కైవసం చేసుకున్నాడు. అతని ఖాతాలో 67,157 పాయింట్లున్నాయి. కాగా చెన్ లాంగ్(చైనా), జాన్ ఓ జొర్గెన్ సన్ (డెన్మార్కు) వరుసగా తొలి, రెండో ర్యాంకుల్లో ఉన్నారు.  పారుపల్లి కశ్యప్ (భారత్) 12వ ర్యాంకులో కొనసాగుతున్నాడు. మహిళల డబుల్స్ లో గుత్తా జ్వాల - అశ్విని పొన్నప్ప జంట 17వ ర్యాంకును కైవసం చేసుకుంది. పారుపల్లి కశ్యప్, సైనా నెహ్వాల్ ప్రస్తుతం జరుగుతోన్న ఇండోనేషియా సూపర్ సీరిస్ క్వార్టర్ ఫైనల్స్ కి చేరారు. ఈ టోర్నమెంటు ఫైనల్ కు చేరితే.. వారి ర్యాంకులు మెరుగయ్యే అవకాశఆలున్నాయి.

జి. మనోహర్