వారికి యువరాజ్ చమట్లు పట్టించాడు?

Posted: 10/17/2013 07:11 PM IST

ఇండియా వన్డే జట్టులో పునరా గమనం కోసం ఎదురుచూస్తున్న భారత సీనియర్‌ క్రికెటర్‌ యువరాజ్‌ సింగ్‌ సునామీలా చెలరేగిపోయాడు. వెస్టిండీస్‌ ఏ జట్టుతో భారత్‌ అనధికారిక వన్డే సీరీస్‌ తొలి వన్డేలో 89 బంతులకే 123 పరుగులు చేసిన యువీ విండీస్‌ బౌలర్లకు చుక్కలు చూపించాడు. యువరాజ్‌ విజృంభణకు యూసఫ్‌ పఠాన్‌ తుపాన్‌ తోడవడంతో నిర్ణీత 42 ఓవర్లలో 312 పరుగులు చేసిన భారత్‌ ఏ జట్టు, రెండో ఇన్నింగ్స్‌లో విండీస్‌ జట్టును చాపచుట్టలా చుట్టేసింది. భారత బౌలర్లు క్రమం తప్పకుండా వికెట్లు తీయడంతో విండీస్‌ ఏ జట్టు 39.1 ఓవర్లలో 235 పరుగులకు ఆలౌటయింది. బెంగళూరు చిన్నస్వామి స్టేడియంలో టాస్‌ ఓడి బ్యాంటింగ్‌కు దిగిన భారత్‌ ఏ జట్టులో 11 ఓవర్లలోనే ఓపెనర్లు ఆర్వి ఊతప్ప (23), యుబిటి చాంద్‌ (1) పరుగులతో పెవిలియన్‌ బాట పట్టారు. చాంద్‌ ఒక్క పరుగుకే ఔటవడంతో వన్‌డౌన్‌లో బరిలోకి వచ్చిన మన్‌దీప్‌సింగ్‌ ఊతప్పతో కలిసి నిలకడగా ఆడుతున్న క్రమంలో ఊతప్ప 27 పరుగులకు వెనుదిరిగాడు. 47 పరుగుల స్కోరు వద్ద 12వ ఓవర్లో మన్‌దీప్‌ సింగ్‌తో జతకలిసిన యువరాజ్‌ ఆదిలో ఆచితూచి జాగ్రత్త పాటించాడు. 38 బంతుల వరకు స్ట్రోక్‌ ప్లే జోలికి పోకుండా నింపాదిగా ఆడిన యువరాజ్‌ తర్వాత 89 బంతుల్లోనే 8 ఫోర్లు, 7 సిక్స్‌లతో సహా 123 పరుగులు చేసి ప్రత్యర్థి బౌలర్లకు చమటలు పట్టించాడు.