కివీస్ తో తలపడేందుకు ద్రావిడ్ సారథ్యంలో రోహిత్ సేన సాధన

Posted: 11/16/2021 09:07 PM IST

Ind vs nz 2021 rohit sharma and team engaged in practice session with head coach rahul dravid

టీ20 ప్రపంచకప్-2021లో సమఉజ్జీ కాకపోయినా పాకిస్థాన్ తో ప్రారంబ మ్యాచ్లోనే ఓటమిని చవిచూసిన భారత్.. అత్యంత కీలకమైన రెండవ మ్యాచ్ న్యూజీల్యాండ్ తో జరిగినా.. చావు తప్పి కన్నులొట్టబోయిందన్న చందంగా ఓటమిని చవిచూసిన విషయం తెలిసిందే. అయితే ఆ తరువాత పసికూనలపై విరుచుకుపడి.. రన్ రేట్ పై ఆధారపడే స్థితికి జారినా.. ఆ అవకాశాన్ని ఏ జట్టు ఇవ్వకపోవడంతో చేసేది లేక చేతులెత్తేసి ఇంటిముఖం పట్టిన జట్టు.. తాజాగా మరోమారు న్యూజీల్యాండ్ తో తలపడేందుకు సిద్దంగా వుంది.

ఈ క్రమంలో జట్టు నాయకత్వ మార్పులతో పాటు ఇటు శిక్షకుడి స్థానంలోనూ మార్పులు జరిగడంతో భారత్ ఇక సాధనకు తెరతీసింది. స్వదేశంలో కివీస్‌తో జరుగుతున్న సిరీస్‌ ఆడేందుకు సిద్ధమవుతుంది. టి20 ప్రపంచకప్‌లో నిరాశపరిచిన టీమిండియా స్వదేశంలో న్యూజిలాండ్‌ సిరీస్‌పై దృష్టి పెట్టింది. స్వదేశంలో జరుగునున్న ఈ సిరీస్ లో పర్యాటక జట్టుపై బదులు తీర్చుకోవాలన్న కసితో రోహిత్ సేన కదం తొక్కుతోంది. నవంబర్‌ 17 నుంచి టి20 సిరీస్‌ ఆరంభం కానున్న నేపథ్యంలో టీమిండియా నవంబర్‌ 14న యూఏఈ నుంచి స్వదేశానికి చేరుకొని జైపూర్‌లో అడుగుపెట్టారు.

మూడు రోజుల క్వారంటైన్‌ అనంతరం టీమిండియా హెడ్‌కోచ్‌ రాహుల్‌ ద్రవిడ్‌ నేతృత్వంలో భారత జట్టు తమ ప్రాక్టీస్‌ను ఆరంభించింది. ఇక రోహిత్‌ శర్మకు టి20ల్లో పూర్తిస్థాయి కెప్టెన్‌గా ఇదే మొదటి టి20 సిరీస్‌ కానుంది. ఈ నేపథ్యంలోనే ద్రవిడ్‌ హిట్‌మ్యాన్‌కు బంతులు విసరడం.. అతను కొన్ని చక్కని షాట్లు ఆడడం వైరల్‌గా మారింది. కాగా రోహిత్‌ శర్మ ఇటీవలే ముగిసిన టి20 ప్రపంచకప్‌లో ఐదు మ్యాచ్‌ల్లో 174 పరుగులు చేసిన రోహిత్‌ రెండు హాఫ్‌ సెంచరీలతో మెరిశాడు. కేఎల్‌ రాహుల్‌ తర్వాత టీమిండియా తరపున రెండో అత్యధిక స్కోరర్‌గా నిలిచాడు.