స్లో ఓవర్ రేట్: విరాట్ సేనకు ఐసీసీ జరిమానా

Posted: 12/10/2020 02:22 PM IST

కోహ్లీ సేనకు మరోమారు అంతర్జాతీయ క్రికెట్ కౌన్సిల్ జరిమానా విధించింది. తొలి వన్డేలో ఎదురైన పరాభవం మరోమారు మూడవ.. చివరి టీ20లోనూ టీమిండియా చవిచూడాల్సివచ్చింది. ఈ జరిమానా విధింపుకు ఆసీస్ తో జరిగిన చివరి టీ20లో స్లో ఓవర్‌ రేటు కారణంగా టీమిండియాకు ఐసీసీ జరిమానా విధించింది. ఇన్నింగ్స్‌ నిర్ణీత సమయంలో ఒక ఓవర్‌ ఆలస్యంగా పూర్తిచేయడంతో భారత ఆటగాళ్ల మ్యాచ్ ఫీజులో 20 శాతం కోత విధిస్తున్నట్లు ఐసీసీ ఓ ప్రకటనలో తెలిపింది. ఆన్‌ ఫీల్డ్ అంపైర్లు రాడ్‌ టకర్, అబూడ్‌, టీవీ అంపైర్ పాల్‌ రీఫెల్‌, ఫోర్త్‌ అంపైర్‌ సామ్‌ ఫిర్యాదు మేరకు ఐసీసీ ఈ నిర్ణయం తీసుకుంది.

‘‘ఐసీసీ ఆర్టికల్ 2.22 ప్రకారం నిర్దేశించిన సమయంలో బౌలింగ్ పూర్తి చేయనందుకు ఆటగాళ్ల మ్యాచ్ ఫీజులో 20 శాతం జరిమానా విధించారు. కెప్టెన్‌ విరాట్‌ కోహ్లీ పొరపాటుని అంగీకరించడంతో దీనిపై విచారణ అవసరం లేదు’’ అని ఐసీసీ ప్రకటనలో తెలిపింది. సిడ్నీ వేదికగా మంగళవారం ఆసీస్‌తో జరిగిన ఆఖరి టీ20లో భారత్ 12 పరుగుల తేడాతో ఓటమిపాలైన సంగతి తెలసిందే. దీంతో మూడు టీ20ల సిరీస్‌ను టీమిండియా 2-1తో ముగించింది. ఆస్ట్రేలియా సుదీర్ఘ పర్యటనలో భాగంగా డిసెంబర్ 17 నుంచి కోహ్లీసేన నాలుగు టెస్టుల సిరీస్‌ ఆడనుంది. ఆడిలైడ్ వేదికగా తొలి డే/నైట్ టెస్టు జరగనుంది.