కొత్త జెర్సీలు: టీమిండియా టీ20కి జట్టు ఎంపిక ముందుకు..

Posted: 08/31/2019 07:48 PM IST

New jerseys made india s t20i squad announcement preponed for south africa series

దక్షిణాఫ్రికాతో సెప్టెంబరు 15 నుంచి ప్రారంభంకానున్న మూడు టీ20ల సిరీస్‌ కోసం భారత సెలక్టర్లు చడీచప్పుడు లేకుండా గురువారం (ఆగస్టు 30) 15 మందితో కూడిన జట్టుని ప్రకటించేశారు. వాస్తవానికి విండీస్‌ పర్యటన సెప్టెంబరు 3న ముగియనుండగా.. ఆ తర్వాత ఆటగాళ్ల ఆటతీరుపై సమీక్ష నిర్వహించి 4న టీమ్‌ని ప్రకటించాలని సెలక్టర్లు షెడ్యూల్ రూపొందించారు. కానీ.. కొత్త స్పాన్సర్ బైజూస్‌ ఒత్తిడి మేరకు వారం ముందుగానే టీ20 జట్టుని సెలక్టర్లు ప్రకటించినట్లు తెలుస్తోంది.

టీమిండియా క్రికెటర్ల జెర్సీలపై తమ బ్రాండ్ నేమ్ కనిపించేందుకే 2017లో ఒప్పో సంస్థ రూ.1,079 కోట్లతో ఐదేళ్లకాలానికి ఒప్పందం కుదుర్చుకుంది. కానీ.. రెండేళ్ల వ్యవధిలోనే ఆ ఒప్పందాన్ని బెంగళూరుకు చెందిన ఎడ్యుకేషనల్ టెక్నాలజీ అండ్ ఆన్‌లైన్ ట్యూటోరింగ్ సంస్థ బైజూస్‌కి బదలాయిస్తూ ఇటీవల నిర్ణయం తీసుకుంది. దీంతో.. సెప్టెంబరు నుంచి ఒప్పో స్థానంలో బైజూస్‌ పేరు ఆటగాళ్ల జెర్సీపై దర్శనమివ్వనుంది.

సెప్టెంబరు 4న టీమ్‌ని ప్రకటిస్తే..? సంబంధిత ఆటగాళ్ల జెర్సీలపై బ్రాండ్ నేమ్‌ మార్చేందుకు సమయం సరిపోదని బీసీసీఐని అభ్యర్థించిన బైజూస్‌ సంస్థ.. టీమ్‌ని వేగంగా ప్రకటించేలా పావులు కదిపించింది. జట్టు ప్రకటనపై షెడ్యూల్‌కి టైమ్ ఉండటంతో.. గురువారం రోజు సెలక్టర్లు ఒక్కోరూ ఒక్కో చోట ఉన్నారు. అయినప్పటికీ వీడియో కాన్ఫరెన్స్‌ ద్వారా చర్చించి ఆగమేఘాలపై 15 మందితో కూడిన జట్టుని ప్రకటించినట్లు తెలుస్తోంది.

భారత టీ20 జట్టు: విరాట్ కోహ్లి (కెప్టెన్), రోహిత్ శర్మ (వైస్ కెప్టెన్), కేఎల్ రాహుల్, శిఖర్ ధావన్, శ్రేయాస్ అయ్యర్, మనీశ్ పాండే, రిషబ్ పంత్ (వికెట్ కీపర్), హార్దిక్ పాండ్య, రవీంద్ర జడేజా, కృనాల్‌ పాండ్య, వాషింగ్టన్ సుందర్, రాహుల్ చాహర్, ఖలీల్ అహ్మద్, దీపక్ చాహర్, నవదీప్ షైనీ