యువరాజ్ పై నెగ్గిన పార్థివ్ పటేల్.. ఎలాగో తెలుసా.?

Posted: 02/08/2019 08:17 PM IST

టీమిండియా స్టార్ బ్యాట్స్‌మన్ యువరాజ్ సింగ్-కీపర్ పార్థివ్ పటేల్ ఆన్‌లైన్‌లో ఒకరిపై ఒకరు సెటైర్లు వేసుకుని అభిమానులకు బోల్డంత విందు అందిస్తుంటారు. ఈ సెటైర్లలో చాలాసార్లు యువరాజ్‌దే పైచేయి అవుతూ ఉంటుంది. అయితే, ఈసారి కథ అడ్డం తిరిగింది. పార్థివ్‌ను ట్రోల్ చేయబోయి తానే బుక్కయ్యాడు. జిమ్‌లో వ్యాయామం పూర్తి చేసిన అనంతరం ట్రెడ్‌మిల్‌పై కూర్చున్న పార్థివ్ ఆ ఫొటోను తన ఇన్‌స్టాగ్రామ్ ఖాతాలో పోస్టు చేశాడు. దానికి ‘ఈ రోజుకి అయిపోయింది’’ అని క్యాప్షన్ తగిలించాడు.
 
ఈ ఫొటో చూసిన యువరాజ్ సింగ్.. పార్థివ్‌ను ట్రోల్ చేయాలని భావించాడు. ‘‘చూస్తుంటే బాగా అలసిపోయినట్టున్నావ్.. చెమటలు ధారాళంగా కారుతున్నాయి’’ అని కామెంట్ చేశాడు. అయితే, యువరాజ్ పేర్కొన్నంతగా పార్థివ్ అంత అలసిపోలేదని, చెమటలు రాలేదని ఫొటో చూస్తేనే తెలుస్తోంది. యువీ రిప్లై చూసిన పార్థివ్ తేలిగ్గా తీసుకోలేదు. అంతేఘాటుగా సమాధానం ఇచ్చాడు. ‘‘నా దగ్గరేమీ ఎడిటింగ్ టీం లేదు.. 15 నిమిషాలు చేసి 2 గంటల సెషన్ చేసినట్టు చూపించుకోవడానికి’’ అని యువీకి దిమ్మదిరిగే రిప్లై ఇచ్చాడు. వీరిద్దరి ట్రోలింగ్ ఇప్పుడు సోషల్ మీడియాలో వైరల్ అవుతోంది. అభిమానులు సరదా కామెంట్లతో దీనికి మరింత రక్తి కట్టిస్తున్నారు.