మునాఫ్ పటేల్‌ చుట్టూ మ్యాచ్ ఫిక్సింగ్ ఉచ్చు

Posted: 04/06/2018 08:56 PM IST

టీమిండియా క్రికెటర్, 2011లో ప్రపంచకప్ గెలిచిన జట్టులో సభ్యుడైన మునాఫ్ పటేల్‌ చుట్టూ మ్యాచ్ ఫిక్సింగ్ ఉచ్చు బిగుసుకుంటోంది. రంగంలోకి దిగిన బీసీసీఐ ఈ అరోపణలపై దర్యాప్తు ప్రారంభించింది. రాజ్‌పుటానా ప్రీమియర్ లీగ్ (ఆర్‌పీఎల్) సందర్భంగా జరిగిన మ్యాచుల్లో జరిగిన కొన్ని ఘటనలు ఇందుకు ఊతమిస్తుండడంతో బీసీసీఐ దర్యాప్తునకు ఆదేశించింది. ఆర్పీఎల్ కు కొంత మేరకు ఆర్థిక సాయం అందించిన ఓ వ్యక్తి ‘ఆర్గనైజ్‌డ్ క్రికెట్ రాకెట్’ వెనక ఉన్నట్టు రాజస్థాన్ పోలీసులు అనుమానిస్తున్నారు. అతడి వ్యాపార లావాదేవీలన్నీ భారత్‌కు మూడు ఫార్మాట్లలోనూ ప్రాతినిధ్యం వహించిన వ్యక్తి (మునాఫ్ పటేల్) తోనే ఉన్నట్టు గుర్తించారు.
 
మ్యాచ్ ఫిక్సింగ్ ఆరోపణలపై మునాఫ్‌ను వివరణ కోరగా ఆ ఆరోపణలు అవాస్తవమని కొట్టి పడేశాడు. ఆర్పీఎల్ వంటి స్థానిక లీగ్‌లను ఫిక్స్ చేయలేమని పేర్కొన్నాడు. తనకు క్రికెట్ తప్ప మరో ప్రపంచం తెలియదని పేర్కొన్నాడు. తనపై ఎవరైనా ఆరోపణలు చేసినా.. అది సీఐడీ అయినా, ప్రభుత్వమైనా వదిలిపెట్టబోనని హెచ్చరించాడు. తాను బుకీని కానని, తన బెట్టింగ్‌కు పాల్పడలేదని మునాఫ్ స్పష్టం చేశాడు. ఆర్పీఎల్ లో ఓ మ్యాచ్ లో జరిగిన కొన్ని ఘటనలు ఫిక్సింగ్‌ ఆరోపణలకు ఊతమిచ్చాయి. ఆ మ్యాచ్‌లో బౌలర్ వరుసపెట్టి వైడ్లు వేశాడు. ప్రత్యర్థి జట్టు విజయానికి పది పరుగులు మాత్రమే అవసరమైన వేళ చివరి ఓవర్ వేసిన బౌలర్ ధారాళంగా వైడ్లు వేస్తూ పరుగులు ఇవ్వడంతో మ్యాచ్ ఫిక్సింగ్ ఆరోపణలు తెరపైకి వచ్చాయి.