నేటి హీరో లక్మల్.. బంతికనబడక అగిన అట..

Posted: 11/16/2017 08:21 PM IST

1st test india v sri lanka suranga lakmal stars on rain curtailed day

ఈడెన్ గార్డెన్స్ వేదికగా భారత్-శ్రీలంక మధ్య జరుగుతున్న తొలి టెస్టు మ్యాచులో శ్రీలంక బౌలర్ సురంగ లక్మల్‌ హీరో అయ్యాడు. అతడు బంతి వేయగానే వికెట్లను సమర్పించుకుని హీరోగా మారుస్తున్నారు. ఈ మ్యాచ్ లో టాస్ గెలిచిన శ్రీలంక బౌలింగ్ ఎంచుకుంది. వర్షం వల్ల మ్యాచ్ కు పలుమార్లు అంతరాయం కలిగింది. తాజాగా 11.5 ఓవర్ల వద్ద వెలుతురు సరిగా లేని కారణంగా మరోమారు ఆగిపోయింది. కాగా, తొలి ఓవర్ వేసేందుకు బంతి అందుకున్న లక్మల్ తొలి బంతికే ఓపెనర్ లోకేశ్ రాహుల్ (0)ను పెవిలియన్ పంపాడు.

ఆ తర్వాత జట్టు స్కోరు 13 పరుగుల వద్ద ఉన్నప్పుడు ఏడో ఓవర్ రెండో బంతికి మరో ఓపెనర్ శిఖర్ ధవన్ (8)ను బౌల్డ్ చేశాడు. అనంతరం వెలుతురు సరిగా లేని కారణంగా అంపైర్లు మ్యాచ్‌ను నిలిపివేశారు. కొద్దిసేపటి తర్వాత మ్యాచ్ తిరిగి ప్రారంభం కాగా లక్మల్ బౌలింగ్‌లో కెప్టెన్ విరాట్ కోహ్లీ (0) వికెట్ల ముందు దొరికిపోయాడు. తొలి మూడు వికెట్లు లక్మల్ ఖాతాలోకే వెళ్లగా అందులో రెండు డకౌట్లు ఉండడం గమనార్హం. అంతేకాదు.. మొత్తం ఆరు ఓవర్లు వేసిన లక్మల్ ఒక్క పరుగు కూడా ఇవ్వకుండా మూడు వికెట్లు పడగొట్టడం విశేషం.

టీమిండియా ఆటతీరుపై సోషల్ మీడియాలో అప్పుడే సెటైర్లు వినిపిస్తున్నాయి. అనామక బౌలర్లను హీరోలను చేయడంలో మనోళ్లు ముందుంటారంటూ కామెంట్లు వెల్లువెత్తుతున్నాయి. లక్మల్ ఖాతాలో మరెన్ని వికెట్లు చేరుతాయో చూడాలని మరికొందరు అంటున్నారు. కాగా, వెలుతురు కారణంగా ఆట ఆగిపోయిన సమయానికి భారత్ మూడు వికెట్ల నష్టానికి 17 పరుగులు చేసింది. చతేశ్వర్ పుజారా (8), అజింక్యా రహానే (0) క్రీజులో ఉన్నారు.