రవిశాస్త్రీ ఉత్తమ కెప్టెన్ల జాబితాపై సౌరవ్ గంగూలీ..

Posted: 03/07/2017 05:51 PM IST

భారత క్రికెట్ జట్టు అత్యుత్తమ కెప్టెన్ల జాబితాలో తనను చేర్చకపోవడంపై మాజీ కెప్టెన్ సౌరవ్ గంగూలీ కాస్త ఆలస్యంగా స్పందించాడు. తన కెప్టెన్సీ సమయంలో రవిశాస్త్రి క్రికెట్ చూడకపోవడం ఒక కారణం కావచ్చంటూ గంగూలీ చురకలంటించాడు. 'నేను భారత జట్టుకు కెప్టెన్ గా ఉన్న సమయంలో రవిశాస్త్రి క్రికెట్ చూడలేదేమో. కనీసం ఒక మ్యాచ్ ను కూడా చూసి ఉండడు. అందుకే రవిశాస్త్రి అత్యుత్తమ కెప్టెన్ల జాబితాలో నాకు చోటు దక్కలేదు' అని గంగూలీ వ్యంగ్యాస్త్రాలు సంధించాడు.

ఈ ఏడాది జనవరిలో రవిశాస్త్రి విడుదల చేసిన టీమిండియా గ్రేట్ కెప్టెన్ల జాబితాలో గంగూలీకి స్థానం ఇవ్వలేదు. దాంతో పాటు గంగూలీ పేరుతో పాటు నడిచే దాదా హోదాను మరో భారత కెప్టెన్ కు కట్టబెట్టేశాడు రవిశాస్త్రి . గత కొన్ని రోజుల క్రిత టీమిండియా పరిమిత ఓవర్ల కెప్టెన్సీ నుంచి తప్పుకున్న మహేంద్ర సింగ్ ధోనికి దాదా అనే పదాన్ని తగిలించాడు. 'దాదా కెప్టెన్'  ధోని అంటూ కితాబిచ్చాడు. 'ఎంఎస్ ధోని సాధించలేనిది ఏదీ లేదు. దాంతో పాటు అతను నిరూపించుకోవాల్సి కూడా ఏమీ లేదు. కోహ్లికి పగ్గాలు అప్పజెప్పడానికి ధోని చేసిన త్యాగం చేశాడు.దాదా కెప్టెన్ కు  సలామ్'అంటూ రవిశాస్త్రి పేర్కొన్నాడు. తాజాగా ఈ వ్యాఖ్యలపై ఓ టీవీ షోకు హాజరైన గంగూలీ తనదైన శైలిలో ఎత్తిచూపాడు.