తుది జట్టులో పిలుపు కోసం ఎదురుచూస్తున్నా..

Posted: 11/21/2015 06:53 PM IST

టీమిండియా తుది జట్టులో పిలుపు కోసం తాను ఎంతో ఆసక్తిగా ఎదురు చూస్తున్నానని ఒకప్పటి టీమిండియా ఆల్ రౌండర్ ఇర్ఫాన్ పఠాన్ అన్నారు. గాయాలు, పేలవమైన ఫామ్ తో మూడేళ్ల క్రితం జాతీయ జట్టుకు ఇర్ఫాన్ దూరమయ్యాడు. ఆ తర్వాత జట్టులోకి రావడానికి ఎంతో ప్రయత్నం చేసినా, ఫలించలేదు. అయితే, ఇటీవల కాలంలో పూర్తి ఫిట్ నెస్ కనబర్చిన ఇర్ఫాన్.. రంజీల్లో బరోడా తరపున ఆడి సత్తా చాటాడు.

పేసర్ గా టీమిండియాలో స్థానం సంపాధించిన ఇర్పాన్.. క్రమంగా తన బ్యాటింగ్ ను కూడా మోరుగుపర్చుకున్నాడు. దీంతో రంజీలలో ఆడిన రెండు మ్యాచ్ లలో 90 పరుగులు చేశాడు. గుజరాత్ తో జరిగిన మ్యాచ్ లో 73 పరుగులు చేయడమే కాక, ఆరు వికెట్లు తీశాడు. అలాగే పంజాబ్ తో జరిగిన మ్యాచ్ లో రెండు ఇన్నింగ్స్ లలో ఆరు వికెట్లు తీశాడు. ఈ క్రమంలో, తన ఆటను సెలెక్టర్లు పరిగణనలోకి తీసుకుని తనకు టీమిండియా తుది జట్టులోకి మరోమారు అవకాశం కల్పిస్తారని ఇర్ఫాన్ భావిస్తున్నాడు.

జి. మనోహర్