క్షణకాలం పాటు కలవరానికి గురైన అసీస్ జట్టు..

Posted: 12/23/2014 01:31 PM IST

భారత్ తో వరుసగా రెండు టెస్టుల్లో విజయం సాధించిన అస్ట్రేలియా జట్టు.. మూడో టెస్టు కోసం సమాయత్తం అవుతున్న సమయంలో ఒక్క సారిగా కలవారానికి గురైంది. అసీస్ ఆల్ రౌండర్ షేన్ వాట్సన్ తన సహచరులకు తీవ్ర భయాందోళనకు గురిచేశాడు. మూడో టెస్టు కోసం మెల్ బోర్న్ క్రికెట్ గ్రౌండ్స్ లో ప్రాక్టీసు చేస్తున్న క్రమంలో వాట్సన్.. జేమ్స్ పాటిన్ సన్ వేసిన బౌన్సర్ బంతి జోరుగా వచ్చి హెల్మెట్ పై తగిలింది. దీంతో ఆయన అక్కడే కిందపడ్డాడు. వెంటనే రంగంలోకి దిగిన అస్ట్రేలియా జట్టు వైద్యుడు పీటర్ బ్రుకనర్ వచ్చి వాట్సన్ ను ప్రథమ చికిత్స అందించారు.

ఈ ఘటన అసీస్ ఆటగాళ్లను తీవ్ర కలవరానికి గురిచేసింది. అందరి మదిలోనూ ఇటీవలే సీన్ అబౌట్ విసిరిన బౌన్సర్ బంతిని ఎదుర్కోనే ప్రయత్నంలో విఫలం చెంది తలపై బలమైన గాయంతో మరణించిన ఫిల్ హ్యూస్ ఘటనే కళ్ల ఎదుట మెదిలింది. బంతిని విసిరిన జేమ్స్ పాటిన్ సన్ తీవ్ర ఆందోళనకు గురయ్యాడు. అయితే కాసేపటికి వాట్సన్ కోలుకోవడంతో అందరూ ఊపిరి పీల్చుకున్నారు. కలవరపాటు క్షణకాలమే అయినా.. అసీస్ ఆటగాళ్లను తీవ్ర మనోవేదనకు గురిచేసింది. ఈ ఘనటపై అస్ట్రేలియ క్రికెట్ కూడా ట్విట్ చేసింది. వాట్సన్ కు బౌన్సర్ తగిలిందని, అయితే ప్రమాద మేమీ లేదని పేర్కోంది. అంతకు ముందు పేసర్ మిచల్ స్టార్క్ కూడా మెకాలికి బంతి తగలడంతో ప్రాక్టీసు అపేసి రెస్టు తీసుకుంటున్నాడు.

జి. మనోహర్