కర్ణాటకకే సీసీఎల్ -4 టైటిల్

Posted: 02/24/2014 11:03 AM IST

గత నాలుగు సంవత్సరాల నుండి సినీ ప్రేక్షకులనే కాకుండా, క్రికెట్ అభిమానులను అలరిస్తున్న సీసీఎల్ -4 (సెలబ్రెటీ క్రికెట్ లీగ్ ) నిన్నటితో ముగిసింది. నిన్న సాయంత్రం హైదరాబాద్ లోని ఎల్బీ స్టేడియంలో జరిగిన ఫైనల్లో డిపెండింగ్ ఛాంపియన్ కర్ణాటక బుల్ డోజర్స్ టైటిల్ ను నిలబెట్టుకుంది. కేరళ స్ట్రైకర్స్ తో జరిగిన మ్యాచ్ లో కర్ణాటక జట్టు 36 పరుగుల తేడాతో గెలిచి ఈ సీజన్ విజేతగా నిలవడంతో వరుసగా రెండోసారి టైటిల్ ని గెలుచుకుంది.

ఈటోర్నీలో అన్ని భాషలకు చెందిన జట్లు పాల్గొనగా చివరికి కర్ణాటక, కేరళ జట్లు ఫైనల్ కి చేరుకున్నాయి. తొలుత బ్యాటింగ్ చేసిన కర్ణాటక తన అద్బుతమైన ఆట తీరుతో భారీ స్కోరును చేసింది. కర్ణాటక ఆటగాళ్లు రాజీవ్ అద్భుత సెంచరీ (42 బంతుల్లో 112 నాటౌట్, 12 ఫోర్లు, 7 సిక్సర్లు), ధృవ్ శర్మ అర్ధ సెంచరీ (41 బంతుల్లో 56, 6 ఫోర్లు)లతో రాణించడంతో 211 పరుగుల భారీ స్కోరు చేసింది.

ఆ తర్వాత బరిలోకి దిగిన కేరళ స్ట్రయికర్స్ 8 వికెట్లు కోల్పోయి 175 పరుగులు మాత్రమే చేయగలిగింది. నందకుమార్ అర్ధ సెంచరీ (47 బంతుల్లో 78, 8 ఫోర్లు, 4 సిక్సర్లు)తో రాణించాడు. రాజీవ్‌కు మ్యాన్ ఆఫ్ ద మ్యాచ్ అవార్డు లభించింది. టైటిల్ ఫేవరెట్ బరిలో ఉన్న తెలుగు వారియర్స్ సెమీ ఫైనల్ కంటే ముందే టోర్నీ నుండి నిష్ర్కమించిన విషయం తెలిసిందే.