Posted: 11/05/2012 12:55 PM IST

భారత డబుల్స్‌ జోడీ మహేష్‌ భూపతి, రోహన్‌ బొపన్న పారిస్‌ మాస్టర్స్‌ ఓపెన్‌ టోర్నీలో ఫైనల్స్‌ కు చేరుకుని ఈ సీజన్‌లో రెండో ఎటిపి టైటిల్‌కు అడుగు దూరంలో నిలిచిన సంగతి తెలిసిందే.  ఈ దూరాన్ని తుడిచేస్తూ భారత్ కీర్తి పతాకాన్ని రెపరెపలాడించారీ జంట. ఫ్రాన్స్ రాజధాని  పారిస్‌ లో జరుగుతోన్న ఈ టోర్నీలో సీజన్‌లో చివరి మాస్టర్స్ టోర్నీ పారిస్ ఓపెన్‌లో భారత జోడి మహేశ్ భూపతి-రోహన్ బోపన్న టైటిల్ సాధించింది. రాత్రి ఉత్కంఠ భరితంగా జరిగిన పురుషుల డబుల్స్ ఫైనల్లో భూపతి-బోపన్న ద్వయం 7-6 (10/8), 6-3తో ఐజామ్ ఉల్ హక్ ఖురేషి (పాకిస్థాన్) -జీన్ జూలియన్ రోజర్ (నెదర్లాండ్స్) జంటపై గెలిచింది. 84 నిమిషాలపాటు జరిగిన ఈ మ్యాచ్‌లో తొలి సెట్‌లో రెండు జోడిలు తమ సర్వీస్‌లను నిలబెట్టుకున్నాయి. టైబ్రేక్‌లో భూపతి జంట పైచేయి సాధించింది. అటు రెండో సెట్‌లో తమ సర్వీస్‌ను ఒకసారి కోల్పోయిన భారత జోడి ప్రత్యర్థి సర్వీస్‌ను రెండుసార్లు బ్రేక్ చేసి మ్యాచ్‌ను సొంతం చేసుకుంది. విజేతగా నిలిచిన భూపతి-బోపన్నలకు లక్షా 42 వేల 500 యూరోలు (రూ. 98 లక్షల 42 వేలు) ప్రైజ్‌మనీగా లభించింది.
     కాగా, వీరిరువురూ జోడి కట్టాక భూపతి-బోపన్నలకిది రెండో టైటిల్. ఈ ఏడాది ఆరంభంలో దుబాయ్ ఓపెన్‌ను వీరిద్దరూ గెల్చుకున్నారు. ఓవరాల్‌గా భూపతి కెరీర్‌లో ఇది 51వ డబుల్స్ టైటిల్ కావడం విశేషం. గత ఏడాది ఖురేషితో కలిసి పారిస్ ఓపెన్‌ను నెగ్గిన బోపన్న ఈసారి భూపతితో కలిసి నిలబెట్టుకొని కెరీర్‌లో ఏడో టైటిల్‌ను జమ చేసుకున్నాడు. తాజా విజయంతో భారత్ తరఫున అత్యధిక టైటిల్స్ నెగ్గిన క్రీడాకారుడిగా లియాండర్ పేస్, మహేశ్ భూపతి 51 టైటిల్స్‌తో సమఉజ్జీగా ఉన్నారు.
        కాగా,  సెమీస్‌లో ఐదో సీడ్‌గా బరిలోకి దిగిన భారత జోడీ 7-5, 6-3 స్కోరుతో ఆస్ట్రేలియన్‌, బ్రిటన్‌ జోడీ పాల్‌ హాన్లీ, జొనాథన్‌ మార్రీ కంగుతినిపించింది.

...avnk