Posted: 11/03/2012 09:06 PM IST

క్రికెట్ దేవుడు సచిన్ టెండూల్కర్ బ్యాటింగ్ దిగ్గజంగానే మనందరికి తెలుసు... కానీ అతనిలో మరో కళ దాగుందనే విషయం నిన్ననే తెలిసిందే. ఈయన బ్యాటింగ్ మ్యాస్ట్రోనే కాకుండా... గరిట తిప్పడంలో కూడా మ్యాస్ట్రోనేనట. ఈ విషయాన్ని అతడే స్వయంగా తెలపడం విశేషం. ఓ వంటల పుస్తకం విడుదల కార్యక్రమంలో సచిన్ తన ఆహారపు అలవాట్ల గురించి సరదాగా పలు ఆసక్తికర విషయాలు వెల్లడించాడు. అప్పుడప్పుడు ఇంట్లో కూడా వంట చేస్తానన్నాడు. కెరీర్‌లో తిన్న రుచులపై.. ఇష్టమైన వంటకాలపై మాస్టర్ పలు ఆసక్తికర విషయాలు బయటపెట్టాడు.

వంట నాకు ఉపశమనాన్ని ఇస్తుంటుంది. కొన్ని ప్రత్యేక సందర్భాల్లో ఇంట్లో కూడా వంట చేస్తాను. నా భార్య కోసం ప్రత్యేకంగా చేప కూరను వండిపెడతాను... నా చేపల కూర అంటే.. అంజలి చాలా ఇష్టపడుతుంది. ఒక్కోసారి సారా, అర్జున్, అంజలికి బ్రేక్‌ఫాస్ట్ చేస్తుంటాను. గతంలో అయితే తరచుగా చేసేవాణ్ణి. ఇప్పుడు మాత్రం కొన్ని సందర్భాల్లోనే చేస్తున్నాను. ఇవన్నీ మా అమ్మ పుణ్యమే. మా అమ్మ నుంచి నేర్చుకున్నా. చేపల కూర, రొయ్యల మసాలా లాంటి వంటకాలను మా అమ్మ దగ్గర నేర్చుకున్నా. వాటికే నా ప్రయోగాలను జత చేసి అంజలికి చూపించి ఆమెను కూడా ట్రై చేయమంటాను. నేను చేసిన చేపల కూర తాను తిన్న అద్భుత వంటకం అని అంజలి మెచ్చుకుంది. సచిన్ బ్యాట్ తిప్పడంలోనే కాదు.. గరిట తిప్పడంలో కూడా దిట్టే అని క్రికెట్ జనాలు అనుకుంటున్నారు.